📖 ZKIZ Archives

賓架交際 左丁山

2011-12-06  AD

賓架 L在 8?請吃晚飯，點評經濟大勢，左丁山得益良多，食吓食吓，賓架 L突然要左丁山講吓邊位會做下任特首，果真係冇免費晚餐。蘋果日報影響力實在太大，李怡講在豬與狼之間選豬，「蘋果」頭版頭條指「豬狼對決」，於是全城都 講豬狼，令當事人甚為不爽與無奈，梁生否認係狼，唐生就話自己係龍年出生。老友林超榮與太太屈穎妍大力捧梁，佢講得幾妙：「屋頂下有隻豬方可成家，狼字就 係左邊有獸抓，右邊有良心。」賓架 L係要講吓豬贏還是狼勝，點預測呀？賓架 L與班行家大部份認識唐生（曾任財政司司長嘛），普遍認為唐生上場嘅話，佢地知道有延續性及穩定性，至於梁生就係地產測量專家，與地產發展商相熟過與銀行 家，啲賓架唔知佢會有甚麼穩中求變政策，如果純粹講人緣，自不然係唐生在銀行界有充份人脈關係啦。
如何發展人脈關係，係一門學問，就算識「理 論」，都要有心有力去實踐至得。最基本，最入門之書就係 Dale Carnegie（ 1888-1955）之經典名著 How to Win Friends and Influence People（ 1936），左丁山讀中學時，無意中在奶路臣街舊書攤見到，買入後讀咗幾遍，入大學後實踐之，效果十分良好。銀行界中，一位公認其人脈關係無與倫比之傳奇 商人銀行家（有別於今天之投資銀行家） Siegmund George Warburg（ 1902-1982）（歐洲債券 Eurobond之父），在香港曾與東亞銀行合資成立一間「東亞華寶」。華寶先生精於交際應酬，在飛機上與鄰座交談，交換過名片之後，回到辦公室就手寫問 候致意信件寄往對方，對大客熟客更是招呼周到，例如某大戶自法蘭克福到達倫敦，行入酒店室內，已見到華寶先生送來之致意字條與一瓶高檔香檳/紅酒，久而久 之，行內行外人士人人都喜歡與佢做朋友，故此相識滿天下，佢去到邊一個城市，都受當地重要地頭龍歡迎。呢啲事左丁山一早明白其中道理，奈何生性疏懶，偶一 為之則可，長期不懈咁做，就有心無力咯，喺呢方面，香港有一位大賓架，就做到十足嘞，佢年青時曾與華寶先生交往，學到心領神會，現在全世界大公司大銀行嘅 重要人物都畀面佢，邊一位？咪係東亞銀行嘅寶哥哥囉！

PermaLink: https://articles.zkiz.com/?id=29832
Next Page
ZKIZ Archives @ 2019