ZKIZ Archives


獅子山下 左丁山

2011-12-04 NM

靚女 H叫食飯,約在文華酒店扒房。咸豐年前到過文華扒房,印象係外籍高級行政人員多在此吃法國餐,穿整齊西裝,內裏燈光刻意微暗,氣氛比較嚴肅,有時見到啲座 上客,幾乎位位認得,人人可以當新聞人物。多年不到,生疏晒,原來已經裝修到跟以前完全不同,陽光奪窗而入,氣氛似意大利餐廳多過似執到正晒嘅扒房,價錢 就比頂樓嘅 Pierre貴起碼兩三成。靚女 H點解揀呢度呢?佢話久未到中環吃午飯,淨係記得夠晒老牌嘅文華扒房喎。
三句不離特首競選,靚女 H話與成班朋友在十一月廿七日在家打麻將睇會展直播梁振英宣佈參選,梁先生講獅子山下故事─紮腳阿媽穿膠花,講到眼濕濕。靚女 H一位世伯 A今年六十幾歲,世伯 A話:「我年紀大過梁生,我阿媽今年九十歲,仲可以同我出街食飯,阿媽自細都冇紮腳嘅噃,咁梁生阿媽年紀有多大呢?」靚女 H問左丁山:「你阿媽有冇紮腳?」左丁山諗一諗:「我阿嫲享高壽,生於同治末年,有紮腳,阿媽生於民國年代,冇紮腳!」靚女 H話:「咪係囉,所以我哋成班人好奇怪梁媽媽有幾大年紀呀?」

 

呢啲八卦問題不如留番俾啲記者去問,左丁山想講吓獅子山下的故事啫。當年梁錦松唱獅子山 下,俾人批評老套,今天更有不少年青學者大聲疾呼,你哋班上一代仲講獅子山下的故事, out晒嘞, 80後, 90後聽唔入耳。梁生之穿膠花故事只係五六十年代香港社會之縮影,不算特別感人,梁錦松、馬時亨、黃仁龍各有一個,好多商界名人在六十年代爬山、游水逃亡 來港,由無到有,佢哋嘅故事更加動人。當然最動人者,莫如李嘉誠與黎智英,前者十來歲來港,一個人做工奮鬥,晚上在閣仔牀位挑燈夜讀,後來學習造膠花而至 開山寨廠,開大工廠,其他就是歷史了,今天成為城中首富。黎智英話過俾左丁山聽,十二歲來港,在工廠做散工,晚上在貨倉瞓麻包袋,後來學習紡織,竟可以經 營山寨廠至到成為二三十億嘅大型針織廠,創辦佐丹奴,二十一年前創辦嘅壹週刊徹底改變今天香港與台灣的傳媒生態,如李黎兩人之獅子山下故事,真係驚心動 魄,似是神話,梁先生之小時候故事,在五十至八十歲一代,周街都搵到,唔算好特別啫!

PermaLink: https://articles.zkiz.com/?id=29831

Next Page

ZKIZ Archives @ 2019