萬南 二五中環 獨立屋頻爆竊 速遞保險箱搶生意
1 :
GS(14)@2016-03-07 03:09:33http://www.metrohk.com.hk/index.php?cmd=detail&id=303808&search=1雖然正月就快過，但新春Gathering依然唔停，萬南早前去咗個有錢佬慈善晚宴，呢啲場合例牌畀人揼心囗，就連在下呢啲小角色都唔放過，乖乖放低一張金牛。其實有兩類公司都鍾意贊助呢啲活動，第一類老闆係慈善活動嘅搞手，唔撐講唔過去；第二類係想賺有銀仕錢嘅公司。
呢晚就有一間幾出名嘅保安公司好醒目，趁機喺會場宣傳佢哋一個新服務，就係24小時速遞保險箱。簡單啲講，即係租一個容量約兩個A4紙咁大嘅保險箱，有需要就電召保安公司送箱上門，當然亦可以去保險庫自取啦，費用大約每年3皮嘢。
或者你會話好多人屋企都有保險箱啦，有乜需要租咁笨呀？其實好多住獨立屋嘅有錢佬好驚屋企被爆竊，以往亦聽唔少屋主出門遠行，屋企被老爆嘅例子，最新鮮滾熱辣苦主係廖創興銀行創辦人之子廖烈英，其山頂大宅剛剛被爆，損失十幾萬古董。萬南亦聽聞有啲賊相當狼死，要脅屋主打開保險箱偷到盡，所以有錢佬聽到有速遞保險箱，唔少都覺得制得過。