ZKIZ Archives


明益李澤楷? 左丁山

2011-11-24  AD

廂房內人人都識得兩位疑似特首候選人,似以捧唐者佔多數。但幾 大都唔公開表態住,留番選委誕生晒先至講。走出廂房,居高臨下望沙圈,喺樓梯遇到投資專家 A,大家以為「雄心威龍」贏硬,信心十足,於是唔講馬住,講吓股票先。投資 A話:「依家新股上市有隱憂㗎,睇唔通,最好不認購。我已向有關當局反映,上市委員會應該搵多一啲對中國經濟及商業情況比較熟悉,而且仲要識得衍生工具如 何運作,知道民企如何搵蠱惑嘅人士坐入上市委員會。依家唔少投資銀行掛住搵 IPO生意,啲三十幾歲嘅賓架其實經驗唔夠老到,連佢地都容易俾人迷惑㗎,上市委員會負責守龍門,角色好重要。」
唓,上市委員會個個星期開會,文 件積埋有幾公尺高,做委員要盡職嘅話,做得十分辛苦,搵你做咯;投資 A當然知道,所以佢好尊重啲委員為公務犧牲時間,好多投資項目係幾難睇得透嘅,不過買一隻商業信託收息就似乎幾 straight forward。投資 A話:「電盈分拆香港電訊商業信託,照計睇得透嘅!每位八號仔股東可以就持股量嘅一成,申請 BT,譬如李澤楷持有八號仔 26%左右,佢可以申請 2.6% BT,佢又可能準備動用起碼一億美元去掃埋任何股東放棄唔要嘅 BT配額。喂,你唔知呀,呢隻 BT派息幾高嘅噃,我估有成 8厘幾息,李澤楷一年可以收息成億銀港紙,益晒佢。」如果左丁山係電盈 8號仔股東(按:從來唔係),應該唔會放棄申請嘅,否則咪明益李澤楷,俾佢申領埋自己放棄嗰部份?

大家講講吓,馬已經開跑,左丁山睇見步速好慢,大叫不妙,「雄心威龍」可能後上不及,點估 到隻馬係追到呀,但終點前俾隻後勁素來強橫嘅「卡達聖」追及,輸咗個馬鼻,投資 A與左丁山同時大嗌一聲哎吔!左丁山捉住投資 A講:「以為贏梗嘅馬都會輸,咁樣電盈商業信託之高股息,會唔會係『雄心威龍』?」投資 A話:「跑馬冇保證嘅噃,但香港電訊商業信託招股書內載有好多資料,將來如果唔兌現,會有法律責任㗎!」

PermaLink: https://articles.zkiz.com/?id=29550

Next Page

ZKIZ Archives @ 2019