ZKIZ Archives


【好戲派】Eason張艾嘉玩轉辦公室

1 : GS(14)@2015-09-22 02:24:40

一代新人勝舊人?這一代年輕人在職場上已「進化到」以WhatsApp溝通、辭職,眼前只有智能手機,食飯對住電腦螢幕。科技可變人心不變,投機取巧、爾虞我詐、推莊卸膊在職場上浩氣長存。杜琪峯的新作《華麗上班族》就借周潤發、張艾嘉論盡辦公室政治。嫌悶加埋陳奕迅、湯唯辦公室政治加唱歌跳舞,真係有得諗喎!撰文:藍文浩



上映日期:9月24日



早前杜琪峯、張艾嘉及陳奕迅(Eason)為電影《華麗上班族》宣傳接受本報訪問,《華》片改編自舞台劇。故事以2008年金融海嘯中的辦公室生態作主題,杜琪峯導演欣賞後即決定要改編成電影版,以張艾嘉、周潤發、Eason及湯唯擔正演出。



■戲中一幕張艾嘉與Eason決裂,兩人在擂台上較勁。劇照

■陳奕迅笑言跟湯唯的互摑戲份,令他印象深刻。劇照

■好戲之人張艾嘉及周潤發坐鎮,道盡華麗背後的職場黑暗。劇照



演衰格阿頭

訪問一開始,擔任電影版監製、編劇兼演的張艾嘉說:「其實我寫嘅時候金融海嘯未開始,所以(舞台劇)演出嘅時候邊做邊改,改成同金融海嘯有關,雷曼兄弟就係當時爆煲。」飾演唯利是圖不擇手段中層頭目的Eason,接受訪問當日必恭必敬,杜Sir於內地宣傳時對他亦讚口不絕,Eason笑說:「我冇諗住有隻手指公㗎!我好珍惜呢個機會,真係好開心。套戲有阿叔(張叔平)、發哥、湯唯、杜Sir同張姐,有邊個會唔想做?即刻話做,做乜都得!古裝都做!」Eason新秀出身後就已加入樂壇,似乎未有機會做打工仔,問到如何將一個衰格阿頭演繹到形神俱似時,他說:「其實都係以人出發,講人性,做演員要有某程度上嘅imagination。片場嘅佈景已經令我說服到自己。」張姐笑問:「而家知道乜叫accumulator(累計期權)啦?」Eason說:「本身唔知,完全唔知,乜期指、股票,完全唔識。」杜Sir即笑說:「即係當年冇瀨過嘢啦。」


■陳奕迅在戲中演繹衰格阿頭,周旋於張艾嘉與湯唯之間。

與湯唯互摑

其中一場戲張姐與Eason接近決裂,兩人在擂台上講手,鏡頭不長,不過兩人提起卻同時叫苦連天,張姐苦笑說:「都唔知點解會寫一場咁嘅戲畀自己。」另外一場Eason則與湯唯互摑,他說:「我冇留力,佢都冇留力呀!我反應嚟㗎咋,俾人打咪打番佢囉,你有冇試過俾人戴住戒指打?不過做戲冇得諗咁多,做戲最好玩就係可以滿足你平時做唔到嘅嘢嘛!」
Eason飾演的王大偉於片中周旋於張姐與湯唯之間,卻只是為了利益而維持關係,問到與湯唯合作的感受時,Eason笑說:「佢一去到現場就真係好似一個會計部主管,我哋唔使特別溝通,成個過程好smooth。反而群戲有問題,有一場我要逆流逼過人群跑上樓梯,要就攝影機速度,梯級又通窿,其實好攰。我叫製片同導演講,拍多兩個take好喇,我真係唔係好掂,因為下晝仲有一場好激動嘅戲,怕體力透支,不過真係好難忘。」
Eason又笑着說:「今次華人電影入面一個好新嘅嘗試,學到好多唱歌學唔到嘅嘢。好多人話個樂壇好需要我,好似個個都走晒去拍戲咁,咁我就繼續做好我嘅音樂先,亦都歡迎大家加入樂壇。今次係唔會有人拒絕嘅一個機會,所以我好幸運。得閒叫謝霆鋒、楊千嬅佢哋唱吓歌囉,不過真係要睇佢哋自己點諗啦。」



張艾嘉化妝:Annie G. Chan髮型:Ben Lee@AGLOW private I
Eason化妝:Karry Wong髮型:Hei Lee@Xenter





來源: http://hk.apple.nextmedia.com/entertainment/art/20150919/19301083
PermaLink: https://articles.zkiz.com/?id=292391

Next Page

ZKIZ Archives @ 2019