中秋環球月亮女神巡禮 2015年09月17日
1 :
GS(14)@2015-09-19 21:08:48http://www.am730.com.hk/article-281598
中秋佳節又快到，又係講嫦娥奔月故事嘅時候，講足咁多年，又真係幾悶嘅，其實喺世界各地都有關乎月亮嘅神話，當中有唔少都係女神，仲要奉旨天姿國色，又靚又神秘，不如嚟個環球月亮女神巡禮，順便了解吓各地嘅月亮傳說，中秋又多個話題喇！文：77合作社
非洲神話
Gleti
Gleti係非洲達荷美(Dahomey)王國嘅神話人物，呢個王國嘅所在地大概喺今日嘅非洲貝寧。Gleti嫁俾太陽神Lisa，掌管光同愛，每當Lisa經過Gleti面前產生嘅影子，就造成月蝕，佢哋所生嘅就係天上嘅繁星，真係好浪漫。
希臘神話
阿提密斯
Artemis
呢個名應該唔會陌生，事關佢係奧林匹克12個大神之一，亦係攞住弓箭嘅狩獵神，佢孿生哥哥就係太陽神阿波羅，由於天后赫拉(即係宙斯正室)，好妒忌佢哋阿媽生出咁正嘅仔女，所以成日虐待佢哋，佢老竇為咗息事寧人就俾咗太陽阿波羅，俾咗月亮阿提密斯做補償。
芬蘭神話
Kuu
話說空氣嘅女兒Ilmatar，准許一隻水鴨喺佢嘅膝頭產卵，卵變成蛋，隻蛋變成咗宇宙，蛋黃同蛋白分開，蛋黃變成咗太陽，至於蛋白就變成月亮，亦即係Kuu，Kuu喺芬蘭語入面就係指「月亮」。
日本神話
輝夜姬
佢就係日本家傳戶曉傳說《竹取物語》嘅主角，話說有個老伯伯喺劈竹時，喺竹入面發現一個細路女，將佢撫養咗3個月後就亭亭玉立，呢個女仔當然就係輝夜姬，靚到爆嘅佢引嚟好多有錢佬追求，就算皇帝逼婚都失敗，最後喺中秋之夜，月宮使者就接咗佢返月亮，真係打搞晒老伯伯。
瑪雅神話
Ix Chel
佢係太陽神Kinich Ahau嘅老婆，主宰洪水、生育、紡織同破壞女神，佢有一個裝滿洪嘅水樽，一發嬲就將洪水倒落大地懲罰人類，佢頭上畫一條毒蛇，似乎幾好火氣，最有趣嘅係，佢喺月亮都養咗隻兔仔，係咪有啲似嫦娥呢？
羅馬神話
戴安娜Diana
有讀歷史都會知羅馬文化深受希臘文化影響，而羅馬神話嘅戴安娜，都係嚟自希臘神話嘅阿提密斯，羅馬時期唔單止有神廟供奉戴安娜，仲有好多雕象同畫作，就連第78號小行星都喺1980年以呢位女神「Diana(月神星)」命名。
印尼神話
Dewi Sri
印尼爪哇神話嘅人物，掌管大米同生育，所以爪哇人非常重視呢位女神，佢同時亦管治冥界同月亮，佢被描繪為一個年輕、貌美兼婀娜嘅女性形象，佢嘅樣亦可以喺1952年嘅10盾紙幣上面見到，可見佢嘅地位喺印尼依然受到重視。
古埃及神話
哈索爾Hathor
佢係愛、富裕、舞蹈兼音樂女神，不過佢同其他古埃及神嘅關係就不明，有話佢係太陽神(Ra)個女，亦有話佢係老婆，但又有話佢係王權守護神荷魯斯(Horus)嘅老婆，亦有話佢係阿媽，佢嘅形象亦好百變，有時係頭頂有月亮嘅美女，有時係牛頭女身，甚至係一個長有牛耳嘅女人，去埃及旅行不妨留意。
墨西哥神話
Coyolxauhqui
墨西哥古文明阿茲特克神話嘅人物，故事都幾血腥，話說佢阿媽神秘懷孕生咗戰神，佢覺得羞辱，就鼓勵400個兄弟姊妹殺阿媽，於是戰神攞住火蛇迎戰，最後斬咗Coyolxauhqui個頭，個頭就係月亮，戰神因為戰勝月亮就成為太陽。
中國神話
嫦娥
可能好多人都聽過，但係點可以無我國嘅中秋代表嫦娥姐姐呢？喺道教當中，嫦娥稱為太陰星君，又稱月神，話說佢美貌非凡，本來係后羿老婆，竟然偷食咗西王母送俾后羿嘅長生不老藥兼奔月，終身有幫手搗藥嘅玉兔同日日劈樹劈到爆肌嘅吳剛相伴，可惜人類登月無發現佢哋嘅蹤影。