📖 ZKIZ Archives

一孩政策遺禍 左丁山

2011-11-01  AD

世界傳媒經常將中國與印度比較，睇吓邊一個國家制度能夠令經濟發展得最快，社會發展得合乎西方標準（在廉潔，司法，民主自由方面），比較之下，原來中印兩 國同樣貧富懸殊，同樣有大量貧困人口，同樣咁貪污，不過印度係實行具有印度特色的資本主義，司法與選舉制度跟英聯邦國家差唔多，而中國實行具有中國特色的 社會主義，要永遠共產黨一黨專政，黨大於法，故此西方國家普遍與印度同聲同氣。
單純講經濟，印度據講有不少專家研究中國，不斷研究方法跑贏中國， 但中國就冇乜印度專家噃，中國學者着重學習西方，那有時間去研究印度，根本就懶得理會印度。三十年來，以至未來二十年，中國仍有壓倒印度嘅優勢，但二十年 後，中國一孩政策如果不改，會步入老化時間，男多於女，社會經濟因此而失衡，相反印度無人口政策，生育率高，全國年青人佔多數，以後在人才供應方面，勞工 數量方面會趕過中國，大有可能迎頭趕上。當然，印度人口不斷增加，現在已有十二億四千萬人，亦會構成糧食不足問題。
中國一孩政策產生後遺症，已在 年青一代湧現。現任中國國家隊教練甘馬曹係以前西班牙皇馬嘅國腳、中場主將，踢法勇悍，屬於硬漢型，十月十二日中國在深圳迎戰伊拉克（世界盃亞洲分組 賽），賽前就對西班牙傳媒講，中國球員全是家中獨子，在球場上表現唔夠勇悍，好驚受傷。場波踢成點，無謂講，伊拉克長時間在客場以十人迎戰中國十一人，贏 咗二比一，中國隊想去巴西（ 2014）踢世界盃，機會頗低。
然後到咗十月二十四日晚，俄羅斯一間小學足球隊在北京對地壇小學校隊，地壇小學據講 係中國少年足球強隊，球員年紀比對方大一至三歲，身高比俄羅斯小學生高一個頭。俄羅斯話比賽九十分鐘，地壇小學堅持只踢四十分鐘，結果就在四十分鐘之內， 慘敗零比十五。原來中國小學生踢咗二十分鐘已經氣喘喘，跑不動。為何如此？家中獨生子吖嗎，平時上體育堂受傷少少，學校就會俾家長鬧到死。一方面中國在奧 運奪取大量金牌，另方面在小學全民體育就因為孩子受父母、祖父母、外祖父母溺愛，不願拼搏，下一代中國人點同印度人打拼呀？

PermaLink: https://articles.zkiz.com/?id=29158
Next Page
ZKIZ Archives @ 2019