📖 ZKIZ Archives

代理嘆深秋 左丁山

2011-10-10 AD

物業代理專家 S約左丁山聚舊，適逢佢到中環開會，一齊食意大利餐。最近物業代理似乎要食齋噃，十大屋苑在週末嘅成交量唔夠十宗，生意邊度夠分呀？代理 S話：「自從出咗 SSD之後，我地好慘呀，投機炒家，投資收租大戶全部窒晒步，只係靠真正用家支撐市場，成交量大減，我地啲地舖分店一個月收嘅佣金唔夠交租，全港有三萬個 以上持牌經紀，開工做嘢嘅起碼有萬五名，而成交宗數咁少，點夠分？」
額外印花稅在二○一○年十一月二十日推出，殺傷力的確厲害，炒家即時走晒，鬼咩，去年曾特首宣讀施政報告之日，有人搞單天價成交，令曾特首冇晒面，有乜辦法唔出絕招壓樓市吖，做地產要俾番 D薄面行政長官，先至襟撈嘅。
傳 媒話溫州資金撤退，有冇咁事呢？代理 S話：「其實已經撤退咗，傳媒先至報導啫，溫州人以做會形式，夾錢俾會頭出嚟買樓，一買就買十幾二十個單位，造成新聞等報紙報導，會頭就拿着剪報回鄉交 差，以示確有交易，但自從內地抽緊銀根之後，民間私貸利率太高，風險有增無減，啲溫州炒家被逼賣樓回鄉救駕，佢地在○七○八年已經來港買樓，依家賣出去， 唔駛俾 SSD。」
內地人買樓，鍾意一啲 highly visible（隨街見得到）嘅樓，凱旋門最合心水，代理 S話西九漾日居、擎天半島係本港家庭式住宅，內地人唔多啱，凱旋門又高又大又靚，在廣東道買名牌就可以抬頭望得見，最啱內地一家（大婆、二奶、三奶）一人 買一間。內地大款好威風㗎，一拖三咁去睇樓，啲靚女完全冇爭風呷醋，最緊要有香港豪宅揸手。一位內地女明星自拍照片，有無敵維港景，一位代理在微博上發現 之後，立即發動網上搜查，一致認為係女明星住在凱旋門價值六千八百萬元嘅「蝸居」照片！

 

內地靚女係有辦法嘅，我地恨唔嚟。代理 S問左丁山住在邊度，有冇興趣換樓，講完地址，代理 S話：「唉吔，你地屋苑好少人搬嘅，益唔到代理，我地最鍾意一啲位於交通方便嘅名氣樓，最好就係『人見人愛，住落你愛』嗰種，住兩三年就搬走，最益我地不斷有交易做！」

PermaLink: https://articles.zkiz.com/?id=28515
Next Page
ZKIZ Archives @ 2019