📖 ZKIZ Archives

真假政經 - 王慧麟 下一步 (2013年07月18日)

1 : GS(14)@2013-07-19 01:31:30

http://www.am730.com.hk/article.php?article=164006
人生如戲。點估到北京會響政改方面，赤膊上陣呢？
政治老人話，北京都係焗住咁樣做。原本個劇本係相當強硬嘅。即係話，當喬老爺、俞大師響北京講完之後，基本上就響香港社會發酵，跟手就發動啲老朋友四圍唱，一係要，一係唔要。北大人唔怕拉倒。你地香港人唔要就算ｘ數。呢條強硬路線，當初真係冇任何退讓之餘地。
問：不過點解會突然間又好似縮咗條槓呢？
老人家話，Hello Kitty領袖係一個因素。無論點都好，五部曲之中，第一部曲就係要由佢去做。呢位領袖如果民望平穩，都話有得叫佢做下啲邊皮工作，攞番些少功勞。但領袖就出晒事，嗰陣時響香港，港中矛盾好大，佢應該係去撫平香港人同上面之矛盾，點知佢走去搞限奶令，激到阿爺彈起，仲話要港人利益優先，咁佢究竟係咪北京委任㗎？邊個係佢終極boss？阿爺你估唔小器咩？領袖民望仆直，北京又要撲火，呢位領袖又硬頸唔聽，上面由火滾變死心。
老人又說，問題係，死咗心之後，點樣去執個爛攤子。上面都傾咗好耐。最重要係上面啲新領導層忙到飛起，唔係好得閒理會呢個人。後來七一冇乜大嘢發生，咪決定再發功。
問：但係，似乎冇動過Hello Kitty領袖分毫噃？
政治老人話，你要識得閱讀政治。家陣成個垃圾會係二元格局，由西環，注意，係西環，揸莊嘅阿爺部隊，同泛民對決。領袖要做嘢，係去垃圾會做遊說。但係西環要做嘢呢？係唔使去垃圾會，響西環一邊食土豆肉干（簡體字傳神啲），一邊睇直播撳掣。所以，你地係要識得分辨，乜嘢係撳掣，乜嘢係遊說。撳掣嘅至係老闆。今次三個堆填區上垃圾會，真係好有管治危機feel，因為過唔到真係好大件事。
上次長生津嗰陣，西環撳咗幾次緊急掣來救Hello Kitty領袖，如果唔係真係死得。從來老共幹部做嘢，理論上係「專門利人，毫不利己」，默默工作，完成任務之後，全身而退，不拿光環，老毛話齋，「待到山花爛漫時，他在叢中笑」，之但係，唔代表個領袖響度四圍唱，話係佢全部嘅功勞兼政績，唔係嘛！冇西環發功，曾主席會剪布？呢樣嘢會通過？你估西環班朋友，真係冇出力咩？真係響度吹冷氣？有功就攞，仲要攞盡，西環班大哥會點睇？
既然領袖自我表揚，唔自滿，唔肯正衣冠照照鏡，搞內交又冇去西柏坡學習謙虛，覺得自己天才過林立果，西環咪今次響堆填區度放軟手腳，睇你呢班執政團隊有乜嘢功夫咁耍家？立法會內之西環部隊，當冇人響背後開聲指揮，結果就各自修行，投票時就冇晒方向。終止辯論已經算係好畀面，否決仲更冇面。好啦，由頭到尾，究竟嗰位領袖又有冇好似佢話，不失時機咁樣落區聽意見做過嘢？（二之二)
PermaLink: https://articles.zkiz.com/?id=283526
Next Page
ZKIZ Archives @ 2019