好不主席：更低工資
1 :
GS(14)@2012-10-10 00:49:21http://hk.apple.nextmedia.com/financeestate/art/20121009/18036329
上月，香港最低工資委員會決定，建議把實施了一年多的最低工資（時薪）由28蚊加到30蚊，加幅為7%。勞工團體認為加得太少，追不上通脹增長，事實上去年全年通脹率達5.3%，雖然今年稍有放緩，但政府最新公佈嘅消費物價指數都仲有3.7%，累計點都多過最低工資嘅調整幅度。
至於委員會嘅僱主代表亦意料之內地表示加幅太大，又再重提咩外圍經濟情況仍有隱憂，一旦經濟逆轉，最低工資會令啲公司加速結業，最終受害嘅都係啲工人。唔知幾時，我哋啲商家竟然變得咁有良心，原來都係為咗啲員工嘅生計着想，先至唔想佢哋「加人工」。總之，點都要有個勞資雙方利益平衡嘅落點，就算任何一方都未必滿意，但彼此都係要收貨。
猶記得當日，商界的說法咪又係，香港推行最低工資會嚴重影響生意、損害營商環境、打擊投資意欲。總之就係言之鑿鑿，不過睇返啲實際數字又好難自圓其說，譬如話之前叫苦連天，會深受打擊嘅快餐行業。翻查兩間「大」公司嘅最新業績，其中一間盈利續見增長，至於另外嗰間，雖然純利輕微倒退，但係工資福利佔整體成本開支唔夠三成，而仲要喺飯鐘錢計算「還原」嘅情況下，比對同期都只係增加咗成1%咁大把！可想而知，單單最低工資並非經營成本增加的元凶，還有因為通脹而漲價的食材，仲有升幅更加驚人嘅租金。
或者最低工資對於唔同行業嘅影響並非一樣，但我會話就快餐業嚟講，其實係明蝕暗賺，因為幫襯呢啲集團式快餐店嘅好多都係基層市民同打工仔，點都唔係嗰啲為咗做騷同避席先會去食焗豬扒飯嘅尊貴階層，而佢哋用於食物上嘅開支往往會佔收入較高比重。即係話佢哋因為人工（因為有咗最低工資）高咗，消費力同步增加，可以承受食品漲價的能力亦會提高，到頭來亦會保住快餐店的生意額，不至因為消費轉差而減弱。
忍租金罵加薪 助紂為虐
其實除咗商界外，我都聽過社會上有唔少人對最低工資有微言，有位更在其臉書上發表意見，話佢去開間茶（餐廳）記食開嘅X餐，由未實行最低工資時嘅35蚊加到40蚊，家陣間茶記仲話會因應新嘅最低工資而要加到43蚊，所以嗰位朋友就好氣憤，話都係因為最低工資先搞到大家要捱貴嘢。
我亦有認識朋友經營茶記，當知實際情況，若以一間規模唔係好大，可容納幾十人嘅舖為例，真正需要調整工資嘅人手不外乎三幾個，其他都無需要加薪。就以呢幾個「受影響」夥計嘅時薪加2蚊計算，每月成本增加最多都不過係兩千銀到。茶記一日連外賣平均可做二百幾單生意或X餐，除番開，每個餐要分攤增加咗嘅工資成本最多係「三毫子」而唔係三蚊囉！
租金狂升，我哋可以默默承受；通脹加劇，我哋亦會袖手旁觀，但到同樣係成本一部份嘅人工，因為要保障最低層收入嘅人而要增加，我哋卻「接受」唔到。到底呢個社會發生咗咩事，我們只會對霸權俯首，然對弱小吝於體恤？甚至要興師問罪，咁同助紂為虐有乜分別。
盧先亞
2 :
鱷不群(1248)@2012-10-10 01:05:41低能，兩間「大」公司當然無事，死的是一眾小本經營
3 :
Ar Yan(11362)@2012-10-10 06:09:14大公司望最低工資加多的tim，等的小商戶死晒，佢地就食晒成個市場
所以，最低工資時，誠哥話支持就係咁解