ZKIZ Archives


【動畫】G.E.M.明屈林宥嘉甩底年三十衝去台灣見家長

1 : GS(14)@2017-01-19 08:08:03

歌神張學友、已故巨星張國榮……呢啲巨星都未出過自傳,入行10年嘅25歲宇宙巨G.E.M.(鄧紫棋)出自傳式電影《一路逆風》講到佢嘅追夢過程,昨晚喺香港舉行電影首映。一向好受大陸歡迎嘅G.E.M.套《一》今個月6號喺大陸上映,上畫13日,票房僅過300萬人民幣,之前G.E.M.仲話希望票房破億,睇嚟有啲距離噃!昨日有周刊引述一個大陸製作人所指G.E.M.人氣比起之前上《我是歌手》嗰陣,明顯已經冇咁高企,而且負評較多。難怪G.E.M.上次開口話會重回香港樂壇!!!其實G.E.M.今次出自傳式電影,咁啱舊愛林宥嘉同拍拖兩年嘅丁文琪拉埋天窗,佢喺片中都有講舊愛林宥嘉,G.E.M.就話遠距離造成感情裂痕,之不過G.E.M.曾於2014年喺私人facebook鬧爆林宥嘉,指約好去台灣同林宥嘉家人食年夜飯,對方忽然失蹤,結果得G.E.M.同林父母、林宥嘉弟妹去麥記食嘢。昨日有台灣媒體重提舊事,爆當時係G.E.M.同林宥嘉嗌完交處於冷靜期,疑女方自作主張,年三十飛去高雄畀驚喜,打去林宥嘉屋企問地址,要拜訪林宥嘉家人,林宥嘉搵媽咪求助,林母唔想G.E.M.一個人流落台灣,所以同林宥嘉弟妹去接機,再去附近麥記食嘢,冇諗過會成為G.E.M.嘅指控,變成約好晒,林宥嘉忽然「消失」!




來源: http://hk.apple.nextmedia.com/entertainment/art/20170119/19902000
PermaLink: https://articles.zkiz.com/?id=323249

Next Page

ZKIZ Archives @ 2019