財經CAREFREE - 順叔 怪獸傳媒(下) (2012年09月12日)
1 :
GS(14)@2012-09-12 22:09:22http://www.am730.com.hk/article.php?article=121131&d=1841
壹傳媒(282)上星期宣佈可能出售台灣印刷傳媒業務之後，股價反彈唔少，最新市值大約17億元。
本港其他傳媒股，如靠免費報紙廣告收入食胡的星島新聞集團(1105)、專做中文財經資訊的經濟日報集團(423)，甚至喺唔少有錢人士眼中，奇貨可居的最大英文收費報章南華早報集團(583)，派息都同樣慷慨，但市盈率都只係個位至低雙位數字。
乜嘢CEPA中港經濟融合，屍爬咗近10年，最開心的一班人，查實係一眾香港男星女星影星歌星明星奀星，老共對香港娛樂圈北上搵人仔，舉曬五肢歡迎，呢個查實係促使兩地融合最高套路，不過新聞傳媒，好可能係最後一個開放的「專業」，所以香港上市傳統印刷新聞傳媒，到依家都只係一個700萬人口市場，大部分都已經變成細細粒的冷門股，細細注收嚇息，又可以博嚇邊位傳媒老闆因為政治上反枱、或者退休想套現的賣盤機會，不過整體嚟講，市場已唔願意俾傳統印刷傳媒太高估值。
台灣報業亦唔好得去邊，最大的價值，在於兩岸統獨中間的統戰價值，台灣對上一次出現有影響力的報業資產賣盤，是2008年的中國時報，中國旺旺(151)老闆蔡衍明接貨，結果接出個台灣首富，如果壹傳媒老闆黎智英真係想賣，排隊接貨的人龍應該唔短，傳嚇傳嚇，傳到電訊盈科(008)主席李澤楷都係洽購中的買家之一，李澤楷有爹哋科水千幾億銀買玩具，相信買台灣壹仔綽綽有餘，以香港近排共產黨與地產黨、政商媒之間的重組整合之勢，機會可能仲唔細。
至今年3月財政年度，壹傳媒虧損約2億元，已連續兩年冇錢賺，連續4年冇派息，電視及多媒體業務，期內虧損接近12個億，較之前擴大兩倍有多；同期現金淨流出5.2億元，不過期內作價1億美金出售動畫製作業務俾肥佬黎，冇咗呢筆變相大股東注資的非經常性收益及現金收入，壹傳媒其實處於一個一年燒超過10億現金的狀態，壹傳媒平時得罪人多，唔知除美資銀行，有幾多間銀行肯借俾佢，殘價批股集資就算有人接，集資十個億只可以燒一年，又大幅溝淡肥佬黎及員工認股權權益，亦唔係辦法。
壹傳媒上個財政年度，港台兩地印刷傳媒業務，盈利貢獻接近6億銀，冇拆細到台灣賺幾多，只係透露咗《台灣蘋果日報》盈利近兩個億，香港啱啱開始搞免費報章，應該仍在虧損階段，台灣應該好賺啲，保守啲計條婆乸數，當台灣印刷傳媒業務盈利約3億元，市盈率10倍計，盛惠30億元，已遠遠超過壹傳媒市值，呢度仲未計算，如果多個一位台港大孖沙排隊，幫內地將台灣壹仔收復於統一陣線旗下可能出現的併購溢價，如果係咁，呢筆「揞口費」會更和味。
對於壹傳媒小股東嚟講，更加好的消息取決於壹傳媒會唔會全面撤出台灣，連蝕到喊燒到燶的電視業務都摺埋，暫時冇乜呢方面消息，有興趣應該望多啲台灣壹仔員工，在各個傳媒平台有冇風聲表現出來，台灣傳緊肥佬黎有意放售早年買落的地產物業，肥佬黎及壹仔暫時全面撤出台灣，似乎唔係空穴來風，講到尾，肥佬黎因為政治立場被迫變賣家當，已經早有前科，多年前的佐丹奴(709)，就有同一軌跡。
壹傳媒世紀初進軍台灣，正值第一次政黨交替藍綠變天之時，當日香港社會主流意見，要同內地建立更緊密經濟關係，時移世易，今日國共兩黨好似好啱咀型，輪到在台灣搞分化冇乜市場，壹傳媒在台灣的電視落唔到地，反旺中最旺一次公眾集會都谷唔到1萬人上街，就知道就算馬英九政府冇特別針對壹仔，台灣人亦都唔係咁聽肥佬黎支笛，壹仔淡出台灣後，可以集中精神回師香港，發掘及鼓動有「市場價值」的社會情緒，大煲特煲。
今時今日的香港，邊個傳媒唔係怪獸，如果地球存在絕對新聞自由，咁一個二個對傳媒資產好有興趣的大孖沙，個個都好熱心維護香港核心價值囉。話說回頭，如果壹仔在台灣都生存唔到，反而可以在回歸強國15年的香港立足，為香港自由空間擔心到人間煙火都食唔落的人，可以稍稍放心了。