好不主席：特特區
1 :
GS(14)@2012-08-30 13:26:50http://hk.apple.nextmedia.com/financeestate/art/20120830/18003691
好打得嘅林鄭局長接受專訪，被問到房屋問題時，不諱言現時樓市已升至發瘋，並說︰「我得嗰700萬元長俸金，又可以買啲乜呢？」反映現時的樓市已經跟經濟脫曬節，鬼咩，香港樓價的現水平已高出一般家庭年收入成13倍，皆因過去幾年樓價與收入升幅相比，簡直就係差天共地。
唔知各位仲有冇印象，幾個月前有間地產代理公司張貼嘅廣告單張，荃灣楊屋道一個753方呎嘅單位放售，叫價410萬元，家陣可能仲唔止，標題竟然係「窮人恩物」！計番條數，林鄭局長都係啱啱可以脫貧。至於點先算係有錢？最近有個好巴閉嘅豪宅樓盤開售，「據聞」睇樓要先證明自己有50億元身家，按此標準，我就應該勉強夠資格去嗰度應徵做保安經理。
水貨客氾濫 港人捱苦
再講落去就會自我形象低落，都係關心番啲比我更加「弱勢」民眾面對嘅生活困境。首先都係房屋課題，這不但折騰香港市民，對這一任的政府亦是一個燙手山芋。
樓市繼續火熱，政府趁機推出新界東北發展計劃，開拓800公頃土地以增加建屋供應，當然跟手就話係要紓緩樓價升幅。
其實關於開發新界東北嘅意念，早在十幾年前立法會轄下嘅規劃地政及工程事務委員會已有討論及研究，而當時目的也就是尋求解決人口增長帶來的住屋問題。
但一個如此規模的新社區發展大計，無十年八載都難竟其功。遠水能否救近火先唔講住，但係此計劃現在已然變質，因為發展重點已放咗喺打造一個「邊境特區」上面。隨之而來的就是深港邊境模糊化，雖然政府口口聲聲話當中並無政治考慮，但係一個都擺低咗咁耐嘅構思，平地一聲就話要著手動工，你話冇「景轟」又有邊個會信。
能夠借屍還魂都真係要多得思歪，「大和解」都未知解到啲乜，咁快又話要整個「大融合」，佢心裡到底想邊個融邊個都不問可知。
總之「促進兩地之間經濟合作，帶動本港各行各業」嘅說法十足十念口簧，至於你信不信，我反正就是不信。連帶近日公佈的放寬自由行安排，思歪兩個月前先至話過不會再鬆手，但轉過頭，阿爺已單方面宣佈一簽多行，究竟香港仲有幾多自主？特首又仲有幾多誠信？
保皇黨梗係話無問題，仲話可以吸引多些商家來港，帶動經濟，但要知道，今次針對的主要是一批在深圳嘅非戶籍居民，佢哋嘅消費力有幾高都真係唔知，其實亦都冇所謂，因為佢哋好大機會係全盤取代家陣香港嘅水貨客嘅工作，反正邊個帶貨都一樣，最終生計受影響嘅咪又係啲基層市民，連搵餐食嘅機會都冇埋。不過唔緊要，因為到時已經有好多深圳富人落戶「特特區」，佢哋一個抵萬個，香港經濟繼續騰飛！
盧先亞