樂香園：中升幫銀行打工 海迪
1 :
GS(14)@2012-08-21 16:07:14http://hk.apple.nextmedia.com/financeestate/art/20120821/16621894
汽車經銷商中升（881）上半年銷售好勁，升48%，一睇以為發咗達咁款，點知再每一項睇落去，毛利收縮，經營利潤再縮，到純利已經變成倒退27%。海迪認為汽車經銷商的業績充份演繹了何謂「強國模式」：即一味谷大個開頭，最後可能收唔到科。
只睇損益表（ P/L），中升表現無預期咁差，雖然減價促銷令毛利率下滑，但售後服務開始進入高速增長期，並且利錢豐厚，足以支撐到公司一半毛利。之不過，汽車經銷市場原本就相當分散，競爭激烈，議價能力好明顯唔喺經銷商呢邊，有時為咗贏關係要拍心口向廠商勁入貨，遇上市況逆轉，好難周轉。上半年中升營運資金（ working capital）由舊年唔夠9億元（人民幣．下同），急升至今年33億元，經營現金流由以往淨流入，變為流出22億元！
呢個資金缺口去邊到填補？當然就係借！中升截至6月底一年內要還的銀行及其他貸款已高達130億元，流動負債已多過流動資產。就算中升立即時停止擴充，現金流加上手頭現金，都冇可能找到呢條數。當銀行肯 roll-out，中升每年淨係還息都頭痕。賣車有幾多 margin先？似為銀行打工多過為股東。
海迪