📖 ZKIZ Archives

週日趣 BLOGBLOG 分析員之死： Celifazation

1 : GS(14)@2012-08-19 16:29:20

http://hk.apple.nextmedia.com/financeestate/art/20120819/16616454

股市唔掂，投行生意插水，自自然然向 cost centre的分析員開刀，但股榮認為分析員其實死於師奶化，即係 Celifazation（字典查唔到，黃子華棟篤笑首創）。
分析員師奶化，最大特徵係集體行動，見高捧、見低踩，轉軚快過 CY。筆者統計今年表現最好及最差五隻股份（市億百億以上），如依照今年初各投行分析員建議，隨時買10次輸足九次。舉個例，今年股價跌了一半的中興（763），年初建議買入的分析員共27位，三位叫沽，12個月目標價26蚊，現價11.24元。華潤水泥（1313）獲20位分析員叫買，冇人叫沽，平均目標價7.84元，剛好是現價的一半。經過大半年，分析員面對現實，紛紛轉軚，國美（493）建議買入比率由年頭67%跌到10%。
唱好的表現差，唱衰的偏偏反其道而行。10位內房分析員，今年初齊齊叫沽爆綠城中國（3900），結果股價年內彈1.36倍，電力股亦令分析員滿地眼鏡碎，年初推薦買入華電（1071）比率只有四分一，結果爆升六成。
利豐日前放榜令市場大跌眼鏡，據聞不少分析員都覺得被「跣」了一鑊，覺得唔係我估錯，係俾管理層誤導，股價冧兩成，德銀等投行隨後立即將目標價狠劈逾三成。利豐收購代價重估收益，瑞銀去年已經質疑，業界對有關會計手法應心裡有數，分析員呻被坤，無疑師奶上身，喊苦喊忽。
一直以為，分析員理應最瞭解公司情況及行業週期，當他們要淪落到見到公司出盈警或業績，才後知後覺降評級、大削目標價，意義何在呢。牛市人人係股神，分析員出報告唱好，只是錦上添花。只有在熊市中脫穎而出，或提前預警，始是分析員應有的態度，將責任推卸在別人身上，只凸顯自己「燒鵝髀價錢，豆腐渣質素」。
頻密轉軚　猶如散戶
同事高明早前寫過一篇文章，今日可借來一用。渣打（2888）在美國出事，美林分析員15日內連出三份報告，先叫人沽、然後話形勢唔清楚，揸住先，隔幾日雙方和解，就叫人追貨。分析員轉軚之急，猶如師奶煲電視劇，昨天說 A角係奸；今天又話係忠；劇情一變，再話「邪邪哋」，情緒被劇情牽著走。大佬啊，我係要分析員，唔係要情緒員。正如高明話齋，分析員穿上西裝，就是要扮識嘢，可否做戲做全套，不要太散戶？
分析員不易做，繫於行業的先天性缺陷，早前有研究指出，平均10份報告中，七份屬唱好，兩份持中性建議，只有一成唱淡，唱好的欠新意，唱淡的得罪客，難怪有料的分析員，通常由 sell side跳去 buy side做芬佬，不會長期留在研究部。分析員唔想死，請唔該開始麻甩化（ Malufazation）。
股榮
2 : GS(14)@2012-08-19 16:31:12

師奶化
PermaLink: https://articles.zkiz.com/?id=281100
Next Page
ZKIZ Archives @ 2019