📖 ZKIZ Archives

中環在線：「王小股」大鬧中燃

1 : GS(14)@2012-08-17 11:53:31

http://hk.apple.nextmedia.com/financeestate/art/20120817/16611958

「王小股」（左）對住師姐都依然振振有詞，不過呢啲場面對師姐嚟講屬碎料啦。

中燃管理層十問九唔應嘅態度，燃起「王小股」團火，於是掟杯碟發洩。
王姓小股東（暫且叫佢「王小股」）噚日出席中燃股東會同特別股東會，好似歌星咁換衫出場，第二件衫仲襯番新聞頭條，寫住「誓死捍衛釣魚台」，好明顯係有備而來。
[中燃管理層十問九唔應嘅態度，燃起「王小股」團火，於是掟杯碟發洩。] 中燃管理層十問九唔應嘅態度，燃起「王小股」團火，於是掟杯碟發洩。
「王小股」喺會上不停發問，質疑公司賬目，管理層十問九唔應，令佢越問越激動，換咗衫出席特別股東會直情走到台前，企喺主席黃倩如面前，工作人員上前攔截，「王小股」反而擔心自己安全，打999報警。
在旁嘅公關姐姐喺呢個時候講咗句「等警察搞掂佢」，「王小股」就突然情緒失控，係咁追住公關姐姐，兩人喺會場內走呀走，好似玩捉迷藏咁。走咗幾個圈，「王小股」又走咗去掟杯碟，搞到一地玻璃碎，其他小股東見唔對路，雞咁腳離場。警察十多分鐘後到場調停，事件先至平息。唔知嗰位公關姐姐有無嚇親呢?

---

2 : GS(14)@2012-08-22 16:46:40

2012-8-17 MP
中燃股東會搞到要報警 怒漢發問變發火激動下打爛杯碟   

中國燃氣（0384）股東會一向多姿多采，自從前董事總經理劉明輝被捕後， 開親股東會， 無幾個鐘都唔會完。不過，噚日有股東因為得唔到管理層滿意嘅答覆，最終搞到要報警，小琴都係第一次見。

自稱曾為傳媒人為不公義出聲

話說相中人王先生（又名Paul 哥）噚日出席中燃股東會，仲着住一件寫上「日本滾出釣魚台」嘅衫。果然呢位Paul 哥相當愛國，當主持人用英文講解程序時，佢大聲問「點解大家係中國人，唔講中文」。會內有唔少外籍股東，都畀佢搞到一頭霧水。

其後Paul 哥屢次發問，都得唔到管理層回應，佢就愈講愈㷫，愈行愈前，由於佢情緒激動，工作人員上前攔截，佢就話佢受到威脅，要報警求助，仲打爛咗幾隻杯碟。有其他小股東話，公關當時講咗句「要報警搞掂佢」，但Paul 哥就話： 「你要搵警察嚟搞掂我？」結果就先行報警。

中燃梁永昌：小事一件

其實Paul 哥問的問題，都係圍繞以前內地媒體報道過啲事，包括話中燃接駁費造假等等。中燃聯席董事總經理梁永昌事後對記者講，呢啲舊聞，6 月時已經回應過，家無必要再回應。梁永昌仲話，只係小事一件，佢唔當係乜嘢。

事實證明的確只係一件小事，阿sir嚟到都只係要Paul 哥賠番啲杯杯碟碟嘅錢，無拉到任何人。Paul 就話，以前都係傳媒人，遇到唔公義嘅事就要出聲。不過，小琴出席過咁多唔同的記者會，即使問問題得唔到答覆，都未曾試過打爛杯碟發泄喎。email:[email protected]

---

3 : GS(14)@2012-08-22 16:47:19

http://www.sharpdaily.hk/article/fin/20120822/125209
中國燃氣（384）上週的股東會有位姓王的股東搞事，報紙都有報導到，據《明報》報導，佢叫做Paul哥，以前也是一位傳媒人，而小弟再睇真張相，先知道是小弟以前一位舊同事。這位Paul哥相當厲害，當日身穿一件「誓死捍衞釣魚台」的汗衫踩場，型到冇朋友。
事實上，以小弟認識的Paul哥，一向都是講就無敵，所以今次咁高調現身中燃的股東會為民請命，肯定係有嘢！
其實，有跟開中燃的投資者都知道，o依家主要是前董事總經理劉明輝為首的海外股東，與國務院旗下海峽金融的中方股東呈股權爭奪，而經過一輪角力之後，暫以劉明輝一方勝出。據瞭解，民主黨叛徒馮煒光有份的公關公司，就是幫海峽金融一方做公關，而行內人都知馮與Paul哥都相當老友，所以……

---