「醒哥」不《愛·回家》追韓風炒辣雞

2016-05-26 NM

香港人做生意最叻跟風，近年韓菜成「逢開必賺」的神話，炸雞、燒肉、芝士排骨開到成行成市。「選旺鋪、快開、快賺」，已成必賺的方程式。在大台《愛•回家》一劇中，飾演「醒哥」的朱滙林（William），現實中為港大法律系高才生，演藝生涯載浮載沉近十年，眼見韓風在港盛行，決定開韓菜「B家」，更專程到韓國學師近兩年，將當地炒辣雞文化帶到香港。學成歸來，與友人儲了二百多萬，只欠靚鋪一間。有指「搵到好鋪頭，未開已經贏一半」，不少老闆為了爭取人流，多多租金都願意花。但William反其道而行，千選萬選，最後選了大角咀一個丟空近六年的三千呎吉鋪。開業時除了撞正「零售嚴冬」，更因選址人流不佳，導致營業額不足，開業三個月已蝕了數萬，韓菜都難以打救！由畢業後不理父母反對棄做律師，到用十年積蓄開鋪，回本日子十分遙遠，一向我行我素的William坦言已經無法回頭，「其實好驚蝕！」

「韓燒喺香港已經太多，所以一諗已經諗開其他嘢！」William指在韓國春川炒雞盛行，但香港未有太多店售賣，決定一試。「自己都幾鍾意韓國文化，自學韓文都有一段時間，自己儲落筆錢想搞吓生意，兩年前就決定到當地拜師學廚。」之後他找到當地一間賣炒雞的家庭，跟當地的「阿豬媽」（太太）學師。由於炒雞在當地十分普遍，當地家庭亦不介意將食譜傳授給William，他就利用拍劇的空餘時間，一有機會就飛去韓國學師，一學就學了近兩年，「炒雞最大秘訣係由於個爐最大火係中心位，首先要煎熟啲雞先，再將薯仔同墨魚撥去中間，最後先炒菜，因為菜炒太耐好易燶！」學成歸來，他就打算動用過百萬積蓄，與拍檔在港九各區找地方。「旺角、天后等旺區都搵過，但係我就覺得做生意第一步就係要控制成本，租金貴其他成本就好難調整，我就覺得唔係好值。」預算十萬元，在旺區租鋪都不算太難，William解釋：「餐廳太細嘅，就算幾好食啲人都未必再返嚟，因為享受唔到食嘢嘅樂趣！依度確實係好大，連廚房足足有三千呎，入到嚟好多人都會覺得樓底高好大好舒服！」餐廳以韓國炒雞為主打，二人分量一百八十八元有交易，而小菜都是約數十元左右，以韓菜來說價格合理。而大部分客人都對食物質素感到滿意，食客Vincent就大讚牛肉鍋夠惹味，有別於香港常見的部隊鍋。陳小姐就指炸雞分量足夠，但味道就甜了一些。最多的批評都是選擇太少，在附近工作的許太指若能增加適合小朋友的湯麵就更好。食物質素有一定水準，但William對飲食業毫無經驗，首次做老闆即不斷撞板，他更向記者細數三大慘況，令高才生都不得不交學費。

慘況一：鋪過大被彈小貓三四隻

記者甫進店內，發現店內極為寬敞，近二千呎的用餐區，只放了一百個座位，更設置了休憩區、足球機等設施，在香港的店鋪可謂十分罕見。店面大雖然坐得舒適，其實另有危機！不少香港人揀選食肆，除了一部分人會參考網上食評，更有大部分是因為在店鋪外有人潮聚集，「逼逼吓」就排隊一試。William的店過於寬敞，很難製造這個效果，「有啲客會覺得坐得一兩枱，小貓三四隻，我明白香港人唔多唔少都有羊群心理，但成日都坐滿晒其實係好難！」他指夜市時最少可以維持二、三十位顧客，但店外看進去頗為冷清，難以吸引客人。

慘況二：選址問題

第一次到William的店，是根據OpenRice的指示由太子地鐵站出發，網站所指步行約八分鐘便可到達，但發現路程頗為遙遠，途中路經裝修鋪、車房等地，由於不熟悉走了較遠的路，最後要十多分鐘才到達，比預算時間慢了一倍！當初William選這裡開店的原因之一，是看中大角咀的發展潛力，「呢度都係重點重建區，呢區近兩三年，新樓愈起愈多，好多新搬入嚟都係後生仔，點都吸引到佢哋嚟。」可惜餐廳位於洋松街，鄰近食肆不多，居民大多走到附近的大同新邨用膳，似乎如意算盤未能打響。他亦坦言生意未如理想，「平日嚟講生意真係比較差。」

慘況三：老闆慘被員工恰

除了選址外，William亦要面對員工帶來的問題。訪問期間發現他對員工十分友善，與他在劇中對妹妹的兇惡態度大相逕庭。他直言希望跟員工打好關係，但就試過反被員工欺負，「嗰日以為佢遲到，等極都唔見， WhatsApp又已讀但唔回覆，我都好擔心。最後終於覆我話幾日都唔返呀。過幾日佢返嚟就話因為一啲私人事唔開心，其實好多人會即刻炒，但我都俾多次機會佢，但無幾耐又係咁。」他最後雖然無奈辭退員工，但他深信以心待人能留住員工，除了實施業績達一定水平，會有額外獎金外，他更表示有學生講明儲夠錢就走，我盡量會批多啲時間俾佢哋快啲儲錢，預咗佢哋八月前後會走，但無所謂啦，我都俾到六十蚊一個鐘。」

開鋪原因為買樓

William身高外貌不俗，高考以2A2B成績考入港大法律系，理應為「人生贏家」，但畢業後為見識世界做了幾年空少，之後就毅然加入無綫，一做就做了近九年。他解釋讀法律純粹迎合父母意願，到畢業後立志自己決定前路，「中學時已經想做藝人，但屋企人覺得讀好啲書先，畢業之後一直等機會入演藝圈，父母反對都無辦法。好似依家開餐廳咁，我臨開之前都無同佢哋講，自己都係死慳死抵儲錢開。」他坦言不少同屆畢業同學已經「上車」，自己「都有少少後悔」，「我○四年畢業，依家已經無得返轉頭做律師，雖然儲咗百幾萬夠俾首期，但做藝人收入唔穩定，驚買咗樓都未必供到，依家惟有寄望呢盤生意！」

開業資料（02/2016）租金（二按一上）：$300,000裝修及牌費：$2,000,000食材：$100,000雜費：$50,000總投資：$2,450,000

營業資料（04/2016）營業額：$400,000租金：$100,000人工：$140,000#食材：$100,000水電雜費：50,000盈利：$10,000*

#八名全職，三名兼職*開業首兩月皆蝕錢

撰文：梁延宇攝影、攝錄：關永浩[email protected]

PermaLink: https://articles.zkiz.com/?id=199719