中門大開：硬膠特首
1 :
GS(14)@2012-08-08 14:51:39http://hk.apple.nextmedia.com/financeestate/art/20120808/16584581
巿民身水身汗在海灘執膠粒，防止進一步生態災難，另一邊特首在泰國蘇梅島，水清沙幼，湛藍海水，享受假期。大家腦海中同時存在兩幅畫面，感覺極不好受，就似當年沙士，老董以醫生勸喻自己身體好重要，不能親身去淘大災區。當時巿民極之憤慨，所謂領導者，就是身先士卒，小布殊在911後在瓦礫中發表演說，令他人氣大反彈。
有機會做實事 走去放假
振英幾年前以環保人士自居，不斷標榜自己參與環保工作，以拉近同中產距離，一度幾成功，在特首環保論壇中，備受環保人士擁戴。殊不知又係一場形象包裝，當有環境災難時，佢老哥不但冇身先士卒，去沙灘執膠，或召見有關官員，責成他們妥善處理，反而係放假去玩。佢數年來精心經營之環保形象，毀於一旦。
另一方面，膠災亦顯示了振英急巿民所急露出馬腳。抽水做 Show就去到盡，連曾蔭權一年前宣佈老人兩蚊搭車，實施前振英都要抽水做親民 Show。但救災要做實事，要做好各部門溝通，責成各方合作，呢類工夫，以前曾蔭權就駕輕就熟，召開跨部門會議，常秘署長冇人敢詐型，因為各種推搪理由看在曾眼裏，定遭踢爆，所以冇人敢耍佢。
改朝換代後，公務員對振英有戒心，人人自保為先，冇人敢諗多一步，所以反應自然慢，家社交媒體傳播迅速，巿民自力救濟，更加凸顯官僚反應緩慢。一場突發膠災，正是考驗新政府管治能力，有冇心去同巿民站在一齊，拉近距離。振英埋怨大家唔畀機會新政府做實事，社會太政治化，家正是大展拳腳之時，特首又放假去也，下次冇得再怨大家唔畀機會。
一場膠災，踢爆了特首乃一個膠人，政治判斷力差，管治能力欠奉，佢名正言順係一位「硬膠特首」。
添馬男