中環在線：地署例行公事「增值」高官僭建等天收
1 :
GS(14)@2012-07-07 18:05:32http://hk.apple.nextmedia.com/financeestate/art/20120706/16489731
特首梁振英嘅山頂裕熙園大宅僭建搞出大頭佛，一陣話「無心之失」，一陣又話僭建物「買入物業時已經存在」，都唔知點信佢好。好彩，傳媒識得利用政府嘅高空「天眼」圖片，證實僭建出嚟嘅木花棚係 CY入伙後先有，收樓前根本唔存在，唔係真係俾 CY呃晒我哋全港市民！所以真係要多謝天有眼，有天收佢㗎！
咁隻天眼又點嚟嘅呢？地政總署前署長劉勵超噚日喺報章撰文，題為「高官僭建『天眼』不容」，佢話所謂嘅「天眼」圖片，其實係地政總署屬下測繪處負責，每年借助政府飛行服務隊嘅直升機同埋定翼飛機，裝載特別設計嘅相機去做空中拍攝，主要目的就係製作一年出版一次嘅香港地圖。當然，有時測繪處會應其他政府部門嘅特別要求，好似要影山泥傾瀉嘅斜坡咁，就會出動進行空中拍攝。
傳媒善用政府資源
劉勵超話，傳媒家識得善用資源，將高空圖片放大再放大，變成「有相有真相」，成為舉證僭建或者霸佔官地嘅有力證據。原本年年如是嘅高空拍攝例行工作，竟然有新用途，如今次頂證僭建就成為新嘅「副產品」嘞。除咗今次 CY僭建，今年特首選舉期間唐英年嘅九龍塘約道7號「唐宮」大宅僭建，亦難逃高空圖片「法眼」，令唐唐選情人仰馬翻，就知天眼嘅厲害。
李華華