自拍
1 :
GS(14)@2012-05-17 00:17:39http://hk.apple.nextmedia.com/su ... t/20120516/16339524
在這個資訊氾濫的年代，大家每天都有很多東西要記錄，生活上的每一個過程如行街、食飯、去廁所、搭車、搭船、搭訕、搭人買嘢、開心、失意、生病、生瘡、生仔、生滾粥……乜都要拍下來放上互聯網，這樣做確係無聊，但如果不做確顯得自己生活枯燥！但不好意思，政治不正確也要講（因為確實喜歡自拍女性是佔多），喜歡自拍的女士們，可否有幾款相唔好再拍呢？
1.身體上傷口
我明白妳整損撞瘀、爛肉反甲係好痛，係好想有人見到妳個傷口，然後出言安慰，但妳個傷口實在太肉酸，其他人睇到只會出言「 X妳咩！」然後反胃，而我會立刻 Delete埋妳！妳就當我無人性，但確實係令人作嘔！建議妳係要影的話，可以唔好影到咁 Close Up。
2.整頭髮過程
我明白整頭髮的過程是好悶，但我亦更相信整頭髮的過程是極樣衰的，成頭髮夾，件袍又箍到下巴位好肥，而 Salon的燈光通常是從頂而落，這個時候拍照，妳其實記錄緊一隻外星異樣生物，不幸淪落地球，被人類放在實驗室研究的經過，其實影事後咪夠囉，唔需要一定有個好樣衰的比較，先會覺得個頭整得好靚嘅。
3.姊妹相
我明白好姊妹結婚叫妳做姊妹係好難推，但我亦明白主角要靚，首要就係其他人不能靚過佢，所以從來姊妹都不能靚，再加上姊妹的化妝，及那條着到妳又肥又腫又臂粗，十足十夜總會知客的「姊妹裙」，仲要由朝做到晚，姊妹們嗰日係一定樣衰，這事實不能改變，所以盡完責任就算喇，唔好再影相留低陰影，人家影妳都聲明「唔好 Tag我！」
溫提女士們：「亂放一張相，一生形象受影響。」
作者 Profile
編劇、導演兼電台節目主持，認為「愛情」是沒有工作時的玩意，「工作」是沒有愛情時的必需。
作者：鄒凱光