胡孟青：市場低能卻永遠是對
1 :
GS(14)@2012-05-03 23:11:11http://www.sharpdaily.hk/article/fin/20120503/85576
香港地怪事天天有，最近有兩宗情況雷同、判刑卻天與地的危險駕駛官司。首宗上周已判案例，私家車女司機以時速35公里衝進隧道口收費亭，撞死正在收費亭付費的鐵騎士，撞完再輾過，藉口竟然係個仔嗌抽筋，案中形容涉案車輛車身黑玻璃、前座裝了DVD機，假如我係個官，點講都唔會信「個仔嗌抽筋」大人就黐筋嘅超低能藉口；正常駕駛者見前面隧道收費亭，都會收慢車速，斷估怎樣快都不會以時速35公里衝收費亭。一條人命，卻只判監半年，刑罰之輕，令人匪夷所思！人命原來係咁賤！
另一宗雷同個案，私家車司機切雙白線，把電單車司機撞到飛上擋風玻璃，好彩無輾過，不過唔死都重傷，司機不顧而去，更意圖燒車毀屍滅迹，最後被判監四年，停牌五年。車死人，判半年；車唔死，判四年，試問天理何在？人命又何價？
有見及此，股票有股票炒，經濟有經濟衰，原來真係好小兒科，官方製造業PMI連升五個月，表面誇啦啦，內裏卻有渣，滿面批盪仍難掩倦容，靚唔靚任你講，反正一切只係相對；幾多人以為股市未來日子，命懸一線押注大陸，原來內地企業老總睇得個市好悲觀，話明如有鬆綁放水，更要走為上着。信分析員還是局內人，隨便你，反正無人能戰勝市場。
胡孟青
獨立股評人