胡孟青：特首是神獸？
1 :
GS(14)@2012-03-10 12:16:25who is he?
http://www.sharpdaily.hk/article/index/15307/20120309/64718
上市公司的高級管理層作東道主出錢請客，自然係想向你輸送資料，講其所想，目的當然係想講吓業績做吓簡報。
o依家竟然反而要貼錢聽你東家、西家短講私事，在座公關及行家看在眼裏，卻從來冇人會肯做衰人善意提示，自己又唔醒目，有時會諗，難道有人真豁達得完全不介意自己在別人心目中的形象評分？
醒目少少免丟架
不少高管，明顯假設與飯局者應該早在列席前，做足關於上市公司最新公佈的資料搜集的功課，難得聚一聚，簡報Powerpoint完畢後，通常會即時畀機會，任你發問關於公司的問題。
然而，時不時又會有一些「唔生鏽」者，總係要把話題喪扯到老遠，對方見你口沫橫飛，亦不便無禮阻止，明知有人會反客為主，亦都焗住照單全收。
然而，在高管的心目中，對喧賓奪主之輩的斤兩是多少，明顯已經有了盤算；從對方眼神中施展讀心術，也不難知道這些身經百戰、閱人無數的高管，心裏經已暗暗偷笑你Naive and Simple。
上市公司大老闆表面上唔出聲，唔等於鍾意你離題萬丈，曾經有人在類似飯局之上，全程有你冇你，不停講自己嘢，連席上嘅主席黑面都睇唔見，旁觀者自然亦不好意思即時在旁提點，其實，呢啲情況確實都幾尷尬。
記得預早溫功課
不過發生在同一位仁兄身上的笑料，又真係一不離二、二不離三，近期再有一則。就係近期人人討論誰是下任特首的飯局離題討論之上，竟當眾話佢心目中已有特首人選，更大大聲話畀大家知，佢會選「唐振英」做特首，唔知自己錯到飛起唔緊要，不過仲要連講兩次驚大家聽得唔清楚，就極搞笑。
小女子聽到行家在另一飯局上再講呢個笑話，都差點笑到賴尿，難道特首之爭可以買圍骰？定係當咗豬狼可以神獸合體呢？
聽講好多同啲股評人講，當時都笑到人仰馬翻標晒眼水，更有行家笑到企咗起身。
下次有人再當眾扮演追劇一族時，真係要記得預早溫功課，否則又會把《On Call 36小時》講成《按摩36小時》。
胡孟青
獨立股評人