| 郭台銘要變魔 術，將富士康盈利提高，以應付加薪三成，一個方法係提升產品出廠價，譬如iPad咁好賣，暢銷全球，「蘋果」賺到笑，出廠價係有升幅空間嘅，只要喬布斯鬆 開隻手指少少就得o架嘞。但係加價係要講談判條件嘅，美國買家點會同你講人情噃。呢，一位電子廠家透露，iPad現正供不應求，其中一個生產樽頸就係 LCD，由南韓LG、三星等供應，線路板大部份由以前在港上市嘅美維電子供應（按：呢間美維本由唐家控制，後售予一間納斯達克上市嘅美國公司，唐司長弟弟 唐慶年仍然揸fit），各將零件全部交晒去富士康做裝配。因LCD係高科技產品，唔係咁容易於短時間內增加供應，所以iPad嘅產品追唔上市場要求，隨時 會增加零售價。富士康作為裝機廠，目前有啲leverage。 富士康加薪三成，對其他廠家有無影響，廠家Ａ就話一定有。事 實上，內地連年提升最低工資一至兩成，已含有逼使廠家在「價值鏈」（value chain）上爬升之意，所有沿海工廠面對（一）人民幣升值，（二）工資膨脹，（三）民工供應漸少嘅情況下，必須提高生產力，減少浪費，加速自動化，減低 勞工密集成份，先至可以維持競爭地位，不過如此一來，就會產生深層次矛盾。中國咁多農民，每年必須維持GDP高速增長，先至可以㩒低失業率，如果盲目追求 資本密集工業，如何為低技術勞工創造工作與職位？一旦中國形成結構性失業嘅話，唔講得笑噃，中國人口咁多，有失業大軍形成嘅話，中央點可以講和諧，講穩定 呀？廠家Ｈ話：「我唔係經濟學家，諗唔到，目前我哋商人嘅做法，就係將勞工密集工廠搬移至中西部農村附近嘅鄉鎮，將資本密集嘅工廠留在珠三角。」寫到呢 度，突然聽到電台烽煙節目大罵中文大學行政與計劃委員會成員水平低，唔批准「民主女神像」永久放置中大校園，教人懷疑中大之學術水平。唔講政治性嘅事件， 夾硬將學術與政治性事件扯埋嚟講，當然十分混淆；人哋做咗Ａ（女神像），你唔同意，咪專係講Ａ囉，做乜要講埋不相干嘅Ｂ（學術水平），話Ａ唔得，即係Ｂ都 唔掂？ | ||