中環行蠱惑：「金融老鼠」北上搵人仔
1 :
GS(14)@2011-11-21 23:13:49http://hk.apple.nextmedia.com/te ... 104&art_id=15819881
人民幣嘅威力強大，香港各行各業，早已改為主打內地客，咁樣雖然謀殺咗香港呢個經濟體系嘅獨立性，但亦令香港人唔再係「金融老鼠」嘅主要目標，近年少咗本地倫敦金騙案就係一個指標。細莊最近喺東莞見番個相識多年嘅江湖大哥，久別重逢，坐低同佢慢慢傾，講到「金融老鼠」轉型北上搵人仔嘅最新動向。
大哥目前喺東莞同香港都分別有靚會所同 office，業務需要，北上時間多，留喺中環時間少，卡片上牌頭多多，係「精英會」、「財俊會」之類嘅名譽主席、會董之類。細莊知道，呢類會通常同當地政府嘅工、商部門有關係，掌握有「經濟實力」老闆嘅料，再加上由官員出面，要收會員易如反掌。
大款被呃唔敢出聲
名義上有關官員幫助成立呢類商會係促進商業交流，同埋安排不同類型嘅培訓講座，實質搵食卻另有瓣數。喺大陸法制下，有錢人隨時可以變成一無所有，所以內地好多有錢人都想借香港嘅投資移民計劃，買多一個身份做保險，因此，呢啲商會「實際」業務，其實係推銷投資計劃同賣保險。
香港「金融老鼠」睇中呢個市場需求，就搵機會埋手，佢哋亦睇中大陸禁止未獲批准嘅境外投資，所以內地有錢佬即使被呃，亦唔敢貿然報官，更何況「金融老鼠」多數已搞掂官府，所以唔怕一般有錢佬。
大陸佬咁易中招？細莊聽完半信半疑，大哥笑笑口講：「英雄難過美人關。你估我喺性都東莞開會所淨係飲酒咩！」不過，大哥都係嗰句，人如果唔貪，呢班人都唔會有機會。
逢周一刊出