ZKIZ Archives


中環在線:老鄒賣盤信錯有錢人? 李華華


2011-8-2  AD




 

橙天嘉禾(1132)噚日宣佈,首席執行官胡景邵遞信辭職,而執行董事兼首席財務官毛義民就被委任頂上做CEO,根據公司嘅官方公佈,話阿胡係諗住搵其他瓣數所以唔撈,當然,最重要嗰句係佢確認同董事會無分歧喇。

橙天嘉禾CEO唔撈

之不過,華華就有少少奇怪,前陣子同阿胡飯局,明明仲講到鬼死咁有heart做其院線大亨,仲講到為咗份工,搬埋上深圳住,但無情情又起埋身,搞邊科呢?由於阿胡截稿前都未覆call,所以,真相,係未知嘅。

如果華華係鄒文懷,應該都幾後悔將一生心血賣畀伍克波,事關由易手畀波哥到o依家為止,唔見有咩突破,尤其係呢幾年阿爺出力扶持電影文化產業,人哋行家個個出嚟搶餅,橙天嘉禾食唔到呢條水兼無聲無氣!

話 時話,有單電影圈嘅江湖傳聞,華華覺得好適合呢個時候八畀大家知!話說當年「大亨」檔老字號有難嘅時候,佢嘅波友「超級有錢人」曾經幫佢度過難關。時光飛 逝,大亨越嚟越老,又苦無接班人,惟有賣盤搵處好人家。就喺嗰個時候,「超級有錢人」嘅頭馬「貝殼」力推同自己一齊蒲一齊玩嘅「阿球」接手。因為層壓式一 個信一個,最後「大亨」可能響得人因果千年記嘅情況下,焗聽「超級有錢人」支笛,一生心血,咁就賣咗畀電影門外漢「阿球」囉!

李華華

[email protected]


PermaLink: https://articles.zkiz.com/?id=26771

Next Page

ZKIZ Archives @ 2019