大陸地產富豪同靚女名星走埋一齊，仲涉及8.5億人仔巨額資金，就算你幾咁唔心邪，都冇辦法唔亂諗。華華講嘅係恒大地產（3333）老闆許家印，佢搞地產之餘，走去搞足球，居然罕有咁搞到唔使蝕本。往績咁好，所以又準備搞多瓣，搞乜？同唔少「身痕」富豪一樣搞明星！ 據大陸傳媒話，許老闆有意斥資8.5億人仔，搞文化產業集團，下設電影、院線、唱片、動漫、經紀等五大文化創意公司，同佢合作嘅包括當今紅得發紫嘅范冰冰。查實恒大推盤都不時搵明星坐鎮，而范冰冰幾乎係每次都會出席嘅一線女星。 據稱許老闆間公司，家陣已經拍好《師傅》同《彼岸1945》兩套電視劇，之前聲勢浩大嘅《建黨偉業》，佢亦投資咗2%。
2011-7-29 AD