|
||||||
|
較早前有賣樓之 神之稱、眾稱樓神嘅趙國雄公開講：「下半年樓市睇唔通」，好多人不明所以，認為佢故意唱淡。但幾個星期下來，樓市確係交投非常冷落，有報導話慘過金融海嘯 時期，又係嘅，自去年十一月以來，政府收緊樓市信貸嘅措施越來越多，越見入肉，SSD令短線投機絕跡，一千萬元以下樓市收緊按揭尺度，令中產借錢艱難，點 去買樓呀？ 近日就見到一個例子，一個一千一百餘呎單位，售價七百五十萬，一位專業人士住開七百零呎，想話樓換樓，但未賣樓前先要買樓，佢以 前借七成按揭可以借得五百二十五萬，分二十年供，佢覺得負擔得起，但代理提醒佢，七百至一千萬元樓宇，只有能按六成，佢最多借到四百五十萬，連埋印花稅、 佣金、按揭費用、律師費用等等，大嗱嗱要先出三百四十萬元先可以買到層樓。一時之間，邊度有咁多銀行存款呀？一定要同時賣咗層七百呎──當係五百零萬，扣 起銀行按揭貸款，啱啱好，夠冚三百四十萬條數，但係未知道幾時可以賣得成噃，成交價未知如何呢，即使完全OK，先買後賣總有一個時間差。一言以蔽之，呢位 專業人士要籌措三百四十萬元作短期融資，短到一至三個月左右，問題係，去邊度借？專業人士計來計去，一成按揭（七十五萬）之差，就係deal breaker，佢撲水之時，就係差呢瓣，結果係點？唔換樓住囉，再等吓先啦。 將呢件事同一位鍾意買樓收租嘅人士講，佢話：「早啲講吖，我 買。我有現金在手，唔駛短期融資啫！」哎，唔怪得有人講過，收緊樓宇按揭政策，受打擊最大嘅會係有意樓換樓，細樓換大樓嘅中產業主，唔係炒家或買樓收租之 有實力人士。最唔受影響嘅，當然係滿袋現金嘅內地買家啦，呢個時候最益佢地，趁本地中產受限於新按揭政策，就係差嗰一百幾十萬，買唔到，佢地就有機會向賣 家壓價啦。不過據地產王在校友會午餐講，內地買家同樣受到銀根抽緊嘅影響，冇以前咁意氣風發，故此本地樓市進入疲弱期喎！ |
||||||