2011-6-7 AD
|
||||||
|
僭建風波沒完沒 了，連「蘋果日報」都要透過李八方自爆「壹傳媒」大廈天台有疑似僭建物，可知道剃人頭者，人亦會剃其頭。呢幾日聽地產代理、地產投資投機者講，全港周街係 僭建物，去渣甸山、百德新街、半山區豪宅街道，抬頭便可見玻璃密封露台。呢日大學師弟律師F叫左丁山與五位暑期實習生見吓面，傾吓偈，於是請佢地到陸羽飲 茶，呢班入得到法律學院嘅學生，會考高考成績當然屬於精英級，人人成績表都有幾枝火箭，問佢地所居何處，答案係將軍澳、藍田、黃大仙、筲箕灣、城市花園。 再問：「你地住所附近有無見到疑似僭建物？」佢地異口同聲咁答：「成個區都有啦！」 於是同呢班未來律師講：「大律師公會主席職位係法律界專 業人士之峯頂位置，但主席家裏就有違章建築，幾難話自己唔知法律，總之大人物搞僭建，小市民搞僭建，違章建築全港無處不在，數量以幾十萬計，如何解決呢個 法律與現實嘅大矛盾，請你地與法律系教授開一個論壇，討論一番！」 資深地產投資者L講起僭建，講咗一個笑話。有一位相熟代理月前搵佢入康樂 園睇筍盤，叫價低於市場成交價，投資L問：「冇理由啫，呢間獨立屋幾好呀，點解會平咗少少？」代理同佢細細聲講：「呢間屋輸在內櫳與花園、天台，都無僭建 物呀！在康樂園係罕有嘅。」投資C幾乎笑到碌地，笑完後就話：「咁我未必鍾意啫，買咗用嚟放租，業主會蝕底，隔籬間屋有卡拉OK房，有桌球室，我呢間冇 噃，唔夠人地爭！」 總之各師各法去僭建啦，屋宇署請多一萬人去做嘢，日日去巡查，都怕要搞多十年，都仲未可以理順僭建問題。以肉眼所見，一 啲近十幾年落成嘅新屋苑，可能因為管理處管得嚴就完全不見密封露台，與干德道、麥當勞道等三四十年樓齡豪宅大廈有分別。測量師、裝修承包商發嘞，起碼有十 年生意可做，做極不完，以後如果台北、上海都興起嚴打僭建之風，香港「清拆業」更可輸出專才！ |
||||||