ZKIZ Archives


國際化 左丁山



2011-5-21  AD




 

買馬忙中有錯,填飛買單Q,一號搭十號竟然填咗一號搭四號,當一號「喜惑」衝過終點,十號「快利多」如飛殺上之際,左丁山笑到四萬咁口,點知想話拎飛去收錢之時,先至發覺呢條許世勳、黃志祥大富豪單Q竟然係中空寶,唯有嘆句天亡我也,咁冇運,唔怪得呢日輸到面青口唇白。

既 然矇查查咁樣輸錢,搵人傾偈好過。沙圈旁邊碰到財經界人士A君,與佢談起交易所延長交易時間後,交投唔見有增加,但從業員吃飯時間減少,似乎未見其利,先 見其擾民。財經A云:「左丁山,唔好咁短視,要睇遠啲,我地要配合國際與上海交易時段,免致競爭力受損,人地新加坡乜都同我地爭,連人民幣離岸中心都要 搶,新交所交易時間又長,我地唔可以掛住食飯唔做嘢。」

國際化高唱入雲,一般以為係向西方學習,與倫敦紐約睇齊,一於搞出個「紐倫港」,避 免出現一個「紐倫新」,但香港上市公司已由中國國企、民企做主導,恒指走勢常被滬深指數牽着鼻子走,香港好似「國內化」多過「國際化」噃?財經A即時教訓 左丁山一頓:「香港有人抗拒內地,痛批『被規劃』,其實我地回歸後樓市跌足八年,有負資產業主燒炭,全憑○四年自由行遊客做旺個市,地舖與樓價先至開始反 彈至今,你話今日香港可唔可以回復03年前狀態,取消自由行?完全唔俾內地人來港消費、買樓、產子吖?只有大笨蛋至會咁諗。當今國際大勢,係歐美日本東南 亞群起研究中國,群向中國靠攏,對內向嘅美國人來講,美國搞國際化就等於與中國建立更緊密關係,認識中國,影響中國。故此我地香港人如果認為國際化就是學 英美,不讀好中文,不研究國情,就比美國人、歐洲人更落後!」呢番話聽到左丁山眼眨眨,不由得想起香港一啲重要監管架構,如果盲目以為請個洋人做阿頭,就 等於國際化,等於夠中立,未免天真得可憐。香港之真正國際化人士,一定要係本地精英而精通國際慣例兼且熟悉中國情況人士,今時今日仲蠢到以為搵個洋人就可 以抗衡中國,即係想香港金融市場車毀人亡。蓋特納用普通話對王岐山講:「有福同享,有難同當」,你估係乜嘢意思?


PermaLink: https://articles.zkiz.com/?id=25147

Next Page

ZKIZ Archives @ 2019