睇騷討厭事 2014年06月05日
1 :
GS(14)@2014-06-09 00:11:52http://www.am730.com.hk/article-210380
香港人搵食艱難，難得肯花幾百蚊入場睇騷，梗係想有五星級的享受。但如果你咁黑仔，坐正喺啲傾偈傾唔停，人哋睇騷佢開talk騷嘅人隔籬，咁你嗰幾嚿水就等於倒錢落海，唔止無得享受同偶像十年一度嘅見面時刻，仲隨時激到一肚氣。
文：77合作社
隔籬位大聲唱
睇騷心情興奮係人之常情，但high到坐喺位大聲唱嘅行為就好唔要得，將自己嘅快樂建築喺隔籬位嘅痛苦上，唱得仲大聲過台上歌手，變相迫人俾幾百蚊嚟聽你路人甲唱歌，咁你又何必呢！
低頭族病發
話說早排秋生同張敬軒嘅舞台劇公演，演出期間一位觀眾竟然喺度玩電話，個screen啲光不斷滋擾表演者同其他觀眾，結果俾秋生即時喝停，認真火羅到核爆！嗱！如果你次次都遇著呢啲人，就要緊記多啲去捧秋生場喇。
傾偈
以前啲人話有咩留番拜山先講，時代唔同咗，家陣係有咩留番睇騷先講。睇騷鍾意評論嘅人大有人在，仲有人喜歡閒話家常，講下樓下菠菜蓮壞話，甚至討論下國家大事，而且佢哋好傻好天真，以為用喉嚨發音就嘈唔到人，但查實……坐你附近嘅人團火已經燒到嘭嘭聲。
遲入場
返工遲到就話啫，有咩理由睇騷都遲到？扮曬VIP等人哋開始緊先入場，仲要我借借俾閣下行埋去，我睇唔到嗰十幾秒邊個賠？張飛上面寫明開騷時間，咁唔想睇就咪入場啦！計我話，遲到五分鐘就禁止入場，當今樂壇邊個最有quali帶頭？梗係E神啦！佢連歌迷嗌佢都鬧騷擾咯，何況呢啲咁唔尊重表演者嘅人？
四圍fing螢光棒
點解啲人可以成場騷無間斷係咁fing螢光棒？依家啲螢光棒仲要警棍咁大碌，fing到後面嗰個睇唔到騷之餘，仲眼都花埋，一下唔覺意興奮過度分分鐘會打到人，睇完場騷前後左右個個俾閣下撲傷曬，一個二個係咪過度活躍呀？食蕉見到唔該幫手用繩紮住佢啦！
狂尖叫同大叫我愛你
呢樣唔使多講，坐喺隔籬，尤其前面嗰個真係俾閣下嘅音波震到耳膜都穿，仲要失驚無神尖叫，無啦啦示愛大嗌「我愛你」，心血少啲都嚇親，難怪E神都狂躁啦！
硬食二手煙
完騷散場人逼人都仲要點煙，可憐我唔係煙民就硬食大家嘅二手煙。最慘試過俾前後左右一齊圍攻，返到屋企成件衫都係煙味，仲要俾隻老虎乸質疑我唔係去睇騷，係偷偷哋走去蒲，真係水洗都唔清！
食buffet
係！我明！大家都係放工趕過嚟入場，飯都未食梗會餓，但你都唔好咁過分，喺度開大食會咁至得㗎！唔係講笑，親眼見過有人食叉燒飯、粥、雞髀、成個老麥餐汽水加大兼仲要食埋shake shake薯條，jap jap聲，真係好騷擾啊大佬！
出入平安
算我唔好彩，坐正路口，倘若閣下個腎唔好要成日去廁所，我體諒，但阿姐姐仔你每隔10分鐘就行出去傾電話，行出行入，下下要我縮腳讓路，真係好煩囉！阻到我又阻住後面，你醜唔醜呢？
龍友上身
喂！哥仔，想留個紀念就去買souvenir，或者幫襯門口專業賣相佬啦！係都要拎部相機 加長炮同電話出嚟泣泣揚揚，俾你閃到眼都花喇！坐到山頂咁遠，咪又係影到粒米咁大把，專心欣賞表演好過啦！
小S啜住睇騷
1 :
GS(14)@2016-02-08 03:00:05台灣富商郭台銘太太曾馨瑩、賈永婕、隋棠與老公Tony、陳曉東及太太王妤嫻、小S徐熙媛、Makiyo和A-Lin等，昨晚去到台北小巨蛋向麥當娜朝聖，香港的李蕙敏更專程到台灣睇騷，她說：「我都係上網撳飛，我本來早啲想買紀念品，但落雨又多人，都係放棄，早啲過去排隊等入場。」
■曾馨瑩（左）不與老公郭台銘到來，偕賈永婕到場。台灣《蘋果日報》
■陳曉東早看過娜姐個唱，今次是專程與老婆同來欣賞。
小S以娜姐在《神秘約會》（Desperately Seeking Susan）的電影造型現身，她驕傲地說：「我特地請造型師準備了這身，完全參考麥當娜的造型。」郭台銘太太曾馨瑩和賈永婕結伴出席，甫現身只說「謝謝」便匆匆入場。隋棠與老公Tony放低囝囝，隋棠夫婦說：「我們很喜歡看現場表演，今晚肯定要來捧場。」與太太拍拖來到的陳曉東說：「我很喜歡麥當娜，有很多回憶，之前去過溫哥華朝聖，這次是第一次帶老婆看演唱會。」採訪：吳家偉
■李蕙敏表示早早排隊等入場。
■隋棠夫婦稱娜姐是一定要看的女歌手。
來源:
http://hk.apple.nextmedia.com/entertainment/art/20160205/19480078
細個見佢投票俾黎生坤哥帶阿媽去核心內圍睇騷
1 :
GS(14)@2016-05-08 02:56:13■孝順的坤哥昨晚帶媽咪去捧黎明場。
昨前睇騷的藝人及名人有吳業坤、蘇麗珊及男友游學修、蔡思貝、許亦妮、黃心穎、姚子羚、黃智雯、何國鉦、向海嵐、小肥、容祖兒母親、Kawaii及組合天堂鳥的Gordon等。
其中坤哥做乖乖仔與媽媽睇騷，更有粉絲找他selfie，坤哥接受訪問時表示：「媽咪一路以嚟好鍾意黎明，細細個已見到佢頒獎典禮有投票畀黎明，今日同媽咪食母親節飯，之後帶佢過嚟睇，係驚喜嚟，仲同佢講去核心外圍聽吓歌，其實有飛，見到佢好開心。」問他會否爭取入後台集郵，他表示：「會舉手爭取去，覺得係媽咪其中一個心願。」黃心穎則表示自小已鍾意Leon：「之前買咗飛，不過呢個幾月都不停開工，而家先有時間，7點收工即衝過嚟，劇組知我要睇黎明，都早啲畀我收工。自己鍾意黎生啲歌melody簡單易記，廣告拍得好靚，有機會同佢講，四大天王中係最鍾意佢。」
Leon昨晚在8時32分開騷，演唱會核心外圍由海旁到10號碼頭吸引不少人來野餐聽歌，不過就沒有攜帶紅酒及巴馬火腿，以麥當勞外賣居多。採訪：盧妹、曹家誠攝影：陳順禎、沈健程
來源:
http://hk.apple.nextmedia.com/entertainment/art/20160507/19601682
為睇騷冒險攀天窗TWICE兩粉絲 7米墮地重傷
1 :
GS(14)@2016-05-21 13:13:49去年10月出道的韓國女團TWICE走勢凌厲，雖然年頭台灣成員周子瑜陷入「台獨風波」，令TWICE絕迹內地，但無損她們在韓國的人氣。上月TWICE推出第二張迷你專輯《Page Two》，近日她們頻頻出騷表演，前晚到釜山釜慶大學擔任大學慶典的表演嘉賓，吸引數千粉絲聞風而至。現場有學生為爭取有利位置睇騷，鋌而走險攀到天窗看TWICE，最終樂極生悲，兩名女大學生從7米高的地方墮下受重傷，並即送院救治。
【天窗損毀】■韓國傳媒表示天窗位置由塑膠製成。
【四千觀眾】■前晚有近四千人到場睇騷，場面墟冚。
■TWICE前晚表演後即相約食飯，對意外毫不知情。
主辦未作人流管制
TWICE前日連走兩場，先在釜山舉行簽名會，晚上就移師到釜慶大學表演。根據粉絲在網上形容，當晚TWICE表演時吸引最少4,000學生及粉絲到場，大部份學生都逗留在現場的草地廣場欣賞表演。由於現場人數太多，有不少學生因為未能成功爭取到有利位置睇騷，於是走到附近的環境海洋館1樓的天窗位置看TWICE。當時約有10名學生在由塑膠製成的天窗位置睇騷，當他們睇完表演後從天窗下來時，天窗疑因負荷過重而下塌，令兩名女學生即時由1樓墮下距離7米的地面，當中包括一名19歲姓朴的女學生受傷。據知傷者的頭部、膊頭、膝蓋等多個部位受重傷，現場人士亦馬上將二人送院救治。根據韓媒報道，主辦方在表演期間未有作出任何人流管制，亦沒有防止學生爬到高處睇表演的措施，發生意外的環境海洋館亦一直沒有安全設備，所以學生才能夠輕易任意攀上天窗，釀成前晚的意外。而TWICE在表演前後都不知道現場有意外發生，她們完騷後相約食飯更上載照片到網上，看來她們當時仍未知道有學生受傷的消息。另外，今次已不是第一次因為有粉絲爬高處而發生意外，前年10月女團4MINUTE在韓國京畿道戶外表演，數十名觀眾為一睹偶像風采而爬上通風口，結果通風口因負荷過重而倒塌，造成16人死亡、10人重傷，事後演唱會策劃人更疑似引咎自殺。撰文：施洛冰
來源:
http://hk.apple.nextmedia.com/entertainment/art/20160518/19615894
子華教觀眾睇騷禮儀
1 :
GS(14)@2016-08-07 02:03:51陳法拉之前在微博鬧爆，當她在演出舞台劇《前度》時，台下有觀眾在玩手機，影響演出者和其他靜心欣賞的觀眾。前晚法拉和黃子華在表演時，再一次遇到不守規矩的觀眾，其手機還在響起。
■子華笑言台下手機響，會引起連鎖反應。資料圖片
完場謝幕時，子華用一貫幽默的手法教台下觀眾看騷的禮儀：「好彩剛才響起嘅鈴聲歌曲唔係「做隻出色的馬仔」，而係一首我唔熟悉嘅鈴聲，但當鈴聲響起剎那，我又同法拉嗌交嗌到火紅火綠，影響情緒之餘，我又會擔心手機響起，坐喺佢旁邊嘅觀眾可能會殊一聲叫唔好嘈，最後台下就一連串響起唔同嘅聲音！」當然，子華說罷，觀眾是以熱烈的掌聲表示支持和贊同。撰文：非非
來源:
http://hk.apple.nextmedia.com/entertainment/art/20160805/19723319
少時Jessica馬天佑拖手睇騷無聊踎地
1 :
GS(14)@2016-08-16 06:11:22■Jessica近年在香港積極搞潮人時裝生意，更與馬天佑稔熟，前晚齊齊去亞博睇騷。DV圖片
【亞博館】韓國女子組合「少女時代」前成員Jessica（鄭秀妍）自離隊後，不時飛來香港及內地拓展其個人時裝生意，因而與本地潮人馬天佑稔熟。前晚，二人就孖住去亞洲博覽館，欣賞英國電子組合Disclosure的音樂會，同行還有幾位女友人。身穿白衫白褲的Jessica，初時與馬天佑企定定睇騷，不過Jessica全程似乎不太投入，個樣冇乜表情，相反馬天佑就high爆，不時同友人舉手大叫。其間馬天佑見Jessica顯得納悶，亦有氹她，又拖着她手揈揈。雖然Jessica隨着音樂舞動身體，不過好快又停下來，之後就玩電話同影相。其後更「大媽」上身，踎在地上與女友人打牙骹，一行人未等完騷就離開。
【溫馨拖手】■馬天佑見Jessica納悶，即拖着對方手舞動身體搞氣氛。
【影相解悶】■Jessica全晚不太投入，只偶爾拎起手機影相。
DV圖片
【大媽上身】■Jessica忽然大媽上身，踎在地上與女友人打牙骹。DV圖片
傳與韓女不和
雖然Jessica人在香港，但她在韓國又惹是非，有傳她與女歌手Solbi不和，後者不滿外界常將兩人外貌作比較，Solbi更在Ig公開相關截圖，留言表明不要離間她與Jessica關係，之後又忽然刪走留言，好似默認不和之說。採訪、攝影：楊浩賢、陳辰
來源:
http://hk.apple.nextmedia.com/entertainment/art/20160815/19736139
Next Page