ZKIZ Archives


爭人才輸入醫生 左丁山

2011-5-16  AD

 

跨國獵頭公司 Heidrick & Struggles發表一個全球人才指數報告,指世界前十名國家/地區之中,美國第一(74.2),新加坡第五(60.2),香港第八(59.1),到二 ○一五年,美國仍然第一(74.5)、新加坡就跌落第六(61.9)、而香港就跌落第十(60.8),睇數字就話香港有進步,但增幅不及他人,故此排名下 跌,亞洲只有新加坡與香港入到前十名,但香港在好多方面輸俾新加坡。

歐美人士嚟亞洲落腳,往往就想起新加坡與香港,不會想到印尼與印度,中 國近年雖然經濟極之興旺,但限於語言與政治文化環境,外國人才即使向錢看,仍然不會以中國為首位。睇到呢個人才競爭報導之時,剛好收到餐廳羅電郵,通知去 年先至由法國移居香港嘅法國S,已決定舉家遷往新加坡,成班老友會為法國S辦一個惜別BBQ紅酒晚會。想當初,法國S來港,興致勃勃,估唔到咁快就認為新 加坡比香港更有吸引力,香港唔通真係唔夠新加坡鬥?

與基金F講起呢個問題,原來佢對此有過一番研究,非常肉緊,指香港對外開放程度不夠,往 往受制於本地一啲專業團體,行保護主義,阻止外國人才來港,最佳例子就係醫生。新加坡容許外國醫生入境就業(在公立醫院打工),同時加緊培訓新加坡醫療人 才,與此相反,香港約十年前削減兩間大學醫學院學額,兼嚴格不准外國醫生來港掛牌,不少本港永久居民在英國著名大學(如劍橋)取得醫生資格,在英國公立醫 院行醫嘅,如要回港執業,一定要考試,基金F就懷疑港大中大醫科畢業生係唔係叻過人地在劍橋、牛津、澳洲、加拿大大學畢業嘅醫科生!香港應該自己知自己 事,唔夠醫生護士嘅話,就向外招聘,如新加坡與泰國。香港因為大陸產婦來港,逼爆醫院,實施外來產婦限額,主要係從抑制需求入手,但既然不少私家產科醫生 月入過百萬,點解我地唔輸入英國外國醫生呢?難道本地產科醫生每個月賺錢降低到四五十萬元就會餓親?基金F話英國政府財赤不止,公立醫療系統大量裁員,香 港效法新加坡,去英國搶醫護人才,此其時也!


PermaLink: https://articles.zkiz.com/?id=25144

Next Page

ZKIZ Archives @ 2019