|
||||||
|
噚日賣地場上，見到資本策略（497）執行主席鍾楚義左右護法──黃宗光同方文彬。資本策略一直係賣地場稀客，以為佢兩個旨在觀摩，點知手持33號牌嘅黃宗光，居然加入爭地。 認細唔敢去馬 華華見佢出逾廿口價，其間方文彬打咗兩次電話，然後佢哋先擊退華懋吳崇武，繼而力拼中國海外（688）游偉光。就喺拍賣官叫到最後一口價千鈞一髮嘅時候，只見方文彬又講電話，結果唔使華華講，就係唔去馬。 究竟方文彬打電話畀邊個？仲有邊個吖，梗係老闆鍾楚義！事後華華問佢點解唔繼續爭地，鍾楚義話，自己係細公司，中海就係大公司，點同佢鬥，都去到自己心目中嘅上限，惟有認輸留實力下次再嚟過。 |
||||||