http://partipral-hk.blogspot.com/2011/05/blog-post.html
我以為係舊聞黎, 做乜呢兩日又翻炒? 由於大家樂同大快活相似度極高, 雖然此文屬炒冷飯之作, 但都可以俾個機會大家探討下究竟最低工資對大家樂/大快活影響會有多大.
大家樂2009/2010全年員工人數/開支: 15,000 / 1,186,422,000
大快活2009/2010全年員工人數/開支: 4,400 / 424,155,000
用最粗略既計法, 大家樂員工平均每人每月賺 $6,600; 大快活員工平均每人每月賺 $8,000. 若以每月做28日, 每日做10個鍾, 時薪$28計, 實施最低工資制度下兩者每個員工每月薪金應該最起碼提升至$7,840.....
咦? 提升? 無錯, 大家樂要提升員工月薪至$7,840的話, 才能付合最低工資的要求, 總成本計會增加19%, 即由原本既11.8億提升至14億, 相差2.2億, 正正附合篇新聞入面大家樂主席陳裕光既說法!
而大快活又點呢? 原來根本大快活員工平均月薪早在最低工資要求之上! $8,000 vs $7,840! 新制度實施下, 對大快活既影響可能只係極微不足道!
呢個計算雖然係極粗略, 可能會有好多不足之處, 所以我唔敢講話100%準確, 但我估計實際上出現的誤差唔會太大. 大家樂要因為最低工資而出盈警, 係合情合理的, 因為佢地原本員工開支的確不付合最低工資要求; 但大快活呢? 其實所受既影響只會非常輕微, 原因係佢地一早因為員工成本已經犧牲左部份盈利, 以往大快活俾投資者既形象係營運能力較差 (事實上亦可能係), 但依家反而因為咁, 將來因為最低工資而出現既盈利反差會較細.
當然, 我都唔相信最低工資既立法會永遠整死大家樂, 理據來自最簡單既日常觀察 - 小弟住果附近本來有一間大家樂 + 4間茶記, 但今年2月已經有兩間茶記同時執左笠, 而大家樂就繼續日日逼到爆. 最低工資既實施只會加快汰弱留強, 大企業響最低工資制度下既優勢長遠來講理論上只會越大. 生意做多左, COVER到基本開支 (員工成本) 既機會又大番, 即係最後又會將最低工資既影響完全消化.
自己重倉大快活, 最低工資的問題早已考慮而沒有憂慮, 所持理據亦源此以上數據及理念.今日借此機會再講多少少, 純粹係周日閒聊之作, 亦藉此提醒下大快活股東, 唔好因為最低工資問題而沽貨.
其實最低工資對大快活/大家樂既影響無人會今日先知, 投資市場係具前曕性的, 最低工資通過之日 (舊年7月?) 市場早已將此消息消化哂, 要等今日先講最低工資對兩者的影響其實會太後知後覺. 所有人都知既資訊, 價值幾乎等於零的道理就在於此.