|
||||||
|
早上飲茶之後， 在皇后大道中碰到賓架L，咦，穿着T恤風褸喎，唔駛返工呀？截住佢問幾句，賓架L話：「我四月一號已經退休嘞，邊度駛返工啫。」問佢退休後有何大計，賓架 L話：「首先係去旅行，去過幾處地方咯，啱啱去完昆明打波返嚟。至於將來有乜好諗，要再想真啲，但已在灣仔搵咗地方出入。」又係灣仔？去年退休嘅經紀K、 賓架W、財務R等都在灣仔租下寫字樓，得閒就返吓工（即係唔去打波之時），間中為熟客做顧問，但更多時間係做一啲「無糧義工」，賓架L與K、W、R等全部 認識，過去間中有一齊打波，以後在灣仔碰頭，有更多機會。點解齊齊去灣仔呢？左丁山想到一個理由，就係租金遠比中環便宜，而且唔需要租甲級商廈o忝，洛克 道近地鐵站咪夠晒方便囉。賓架L俾埋第二個理由：「灣仔多嘢食呀，中午搵位比較容易。」睇嚟仲會有不少老友退休之後，選擇到灣仔落腳。 點解 退休仲要搵寫字樓，美國時興home office噃，仲可以慳番一筆租金吖。其實此乃男人心魔，退休後既然做「無糧義工」多過做「有償顧問」，租間細寫字樓做乜呢？咪因為返慣工，朝朝唔出門 就唔多安樂，日日屈在屋企，老得更快，且頭腦變得慢幾拍，對社會時事反應慢，再過幾年，唔認out晒都唔得啦。或者仲有一個理由嘅，一位高官對熟人講過， 佢退休後幾怕日日在屋企對住老婆冇嘢講喎！
賓架Y尚未退休，曾經叫左丁山為班相熟嘅退休金融界從業員（佢謙稱啫，實則係金 融界高層）着想，在中環租番個地方，類似一啲business office嘅形式，逐間房計租俾佢哋用，又要請兩個秘書，一個兼職信差為眾人服務，租埋靚影印機、打印機、傳真機共用，不在話下。賓架Y話佢返慣中環， 唔想去其他區域咁講，唔，地址最好喺埋皇后大道中啦，唔通去蘇豪咩，但o依家租金咁貴，點為皮呀？呢個business model唔係幾掂，早知如此，成班人在03年夾錢在皇九買半層，就乜都掂晒。 |
||||||