譚惠珠作為「撐七警」的香港警察員佐級協會創會會長，淵源在於其當差的父親譚松，有老一輩上環街坊都記得，呢個「咩喳」即警署警長的猛人譚松，對鋪頭阻街執法特別嚴，所以街坊都好識做。 翻查資料，譚惠珠老豆做差佬都非常長袖善舞，五十年代已可以現兜兜買入中半山麥當勞道單位，並且經營的士公司生意，一九六四年在中環開設京華酒樓夜總會，以及副線京富酒樓，譚松個仔譚榮就負責酒樓財務；京華酒樓有三層，樓上是Blue Heaven藍天夜總會；所以話譚惠珠老豆出身警界而又能縱橫商界，七警要向這位老前輩學習學習。 胡官猛料媳婦 特首候選人胡官有兩子胡雅烈和胡雅倫，但做律師的孻仔胡雅倫甚少在競選期間露面，不過他活躍於親中人士圈子，不單只是中聯辦菁英會成員，也是廣東省茂名政協以及青年聯會成員，與該會主席的K仔（霍啟剛）玩埋一堆，聽講胡雅倫「老婆」好「猛料」，有次在灣仔福臨門碰到友人，握吓手打聲招呼，呢位豪氣萬千的女子便替對方埋單，睇到老主顧眼凸凸，聽講呢位洋名叫Christina的胡家媳婦為國內高幹的「菲林女」，何謂菲林？現為digital年代，可能要補充一下，菲林年代曬相要喺黑房，走光就唔得掂啦，八、九十後明無？奇哉，向胡官求證孻仔胡雅倫婚姻狀況，他不肯回應，胡官呢方面又唔及林鄭同鬍鬚曾屋企人咁透明噃！ 中環寸嘴：快活谷寸嘴——貪佢夠粗咩！ 跑馬地蓮園近排爆紅，事頭婆霞姐寸嘴夠出位，唓，我一踩入去，佢即刻話：「我知你邊個！」我都回敬佢一句：「我都知你邊個。」我同你哋講，事頭婆七十年代喺尖沙咀間中華酒樓夜總會，係點心部領班，嗰陣都睇得吓，俾個大廚溝咗佢，做咗佢老公，話晒我老豆係中華酒樓二十位創辦人「之一」，有少少股份，大股東就係同珍醬油佬王仲銘，事頭婆又點會唔識我呢？話晒大家都under過我老豆，叫做同門師兄妹，一脈相承都係拋得兩嘴。唉，啲報導話佢以惡聞名，其實做到「𤷪」就真，蓮園冇兵冇卒，樓面又係佢，收銀又係佢，個老公喺廚房煮，真係做到氣咳；睇吓附近競爭對手——跑馬地正斗，地點又靚，又豪裝，做洗碗、樓面有得揀都去人哋度做，蓮園真係冇條件去比，叫做喺個niche度生存；所以蓮園都係揀客，專做外賣乾手淨腳，我覺得佢啲出品係超值嘅！個老友問我，霞姐後生喺酒樓做點心領班，個樣又睇得吓，點解冇啲富貴茶客溝佢？我話：「唓，貪佢夠粗咩！」 楊國佳工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。 夢熊追女有術 夢熊出獄後並無勁料爆，但提起他身邊的紅顏知己何綺雲（Margaret），猶如蜜運中少男，春情蕩漾，當日他步出赤柱監獄，手持一袋物品，原來是坐監期間與「紅顏知己」每週的「情書」，在一個洗塵飯局上，他滔滔不絕憶起追女事跡；原來他與何小姐八十年代邂逅於廣州，對方曾在廣州選美會獲第五名；在金融市場上，Dream Bear為求做刁，不惜坐在大孖沙寫字樓死等，為求見對方一面，「死纏爛打」一招用於追女上亦奏效，Dream Bear自爆曾經冒着雨在灣仔警署前面，104號過海隧道巴士站，打着傘等「紅顏知己」落巴士再送她回寫字樓，仲話幫自己買咗份四千萬元保險，受益人為對方，亦慷慨贈一層豪宅作歸宿，Dream Bear明白到女人講心亦要講金的道理，咁何小姐又點會唔到手呢？ | ||||