|
||||||
|
獅子錢莊前主席龐約翰年前退休，告老而歸田，佢老人家決定唔留喺祖家而回流返香港也。以獅子主席嚟講，佢呢個做法堪稱罕見，香港對佢幾咁有吸引，仲使多講乎？ 事實亦然。龐主席喺香港先後度過十八個寒暑，由紅褲仔做起，繼而外派到花旗打理海豐；直至浦偉士退休佢至去倫敦揸弗。情繫香江，英倫三島，點住得慣呢？ 龐主席回流香港嘅情形可能愈益普遍。君不見鄭海泉嘅上手、獅子前亞太區主席艾爾敦，退休後唔係留港建港，做其香港總商會會長乎？不過佢好似冇加入DAB噃。一鱷大於一鱷 慶豐金陳發柱、陳發樑兩兄弟雖則有王正宇大狀幫手，都打唔甩造假數罪名，雙雙入罪。 佢哋筆假數點做法？好簡單，五鬼運財之術也：首先以私人名義借一億銀俾上市嘅慶豐金，然後再由慶豐金借一億銀俾五間珠寶公司。唔使講呢五間公司都係佢兩兄弟控制之空殼公司。結果？呢一億銀輾轉流入咗佢哋嘅私人戶口，袋袋平安，但上市公司則欠佢哋一億。 耐人尋味者，係慶豐金還錢俾佢哋，竟然有五千五百萬現金及三千萬股票由陳發柱嘅戶口轉咗俾「股壇放數佬」、明日國際大股東佐治‧陳遠明。乜解究？佐治‧陳喺九九年借咗一億二千萬俾陳發柱也。 ○○至○一年，慶豐系最艱難，欠債高達十億；為咗借錢救急，陳發柱將長發建業嘅股票押咗俾佐治‧陳。就係咁佐治‧陳就攞走咗長發個殼，跟住轉手賣咗俾金融奇女子樂家宜嘅金榜集團矣。 螳螂捕蟬，黃雀在後。喺股壇則一鱷還有一鱷大。信耶？ |
||||||