昨日，日本政府突然宣布，調升日本福島核事故評級至最高的七級水平，與1986年蘇聯的切爾諾貝爾核洩漏事件同級，這個公布說明，放射性物質 正大量洩漏﹐並對人體健康和環境造成大範圍影響﹐日本政府需要擴展對策範圍。消息發表之後，亞洲區股市全面下跌，恆指裂口下跌三百多點，收報23,976 點。
上星期，一眾財演正興高采烈同你講，港匯轉強呀! 資金重返新興市場呀! 美國經濟數據向好呀! 國內加息，壞消息出盡呀! 港股估值便宜呀! 大市轉勢呀! ABCD大落後，短線可吼，兩蚊買入，兩個半止賺，個半止蝕呀! 睇好EFGH，買WXYZ購輪呀! 動態價值投資，刀仔鋸大樹，買LMNOP牛證呀! 本金唔夠唔緊要，可以問銀行借LOAN呀! 開個孖剪戶口，加大槓桿，回報更高呀! 仲唔夠本? 搵SHOW ME THE MONEY，層樓做埋二按呀! 可惜，在一片歡樂的背後，個市突然裂口下跌，你說怎麼辦怎麼辦?
笑話講完，回復正題，投資第一要訣，唔係問上望多少，回報有幾高，今個星期可以賺幾多成，今個月可以賺幾多倍，一年內可否搵夠上岸，而係問投資風險 有多高，下跌風險有幾多成，本金會否輸清光，輸清光之後會唔會仲要爭人周身債，比人追上門收數淋紅油，自己衰唔緊要，賭仔爛命一條，最多一死以謝天下，但 係你上有高堂，下有妻兒，你又會否連累佢地幫你還債? 本人開宗明義教人長線投資，如果你買入的是優質股票，突如其來的突發事件，令手中股票之股價突然下跌，根本對你沒有影響，你每天一樣照常生活，照常返工， 每年定期照常收到股息，年復年後手上資產照常升值，十年、廿年後你照常達致財務自由。