ZKIZ Archives


亞皆老街狙擊手中巴第一炮

2017-02-02  NM

華懋旗下安寧控股(128)揸住2%中巴(26)股份多年,揸到無癮,卒之以好意頭價,每股$88.8掟貨予葉維義旗下亞皆老街管理基金,雖然係來自土炮嘅亞皆老街,但唔輸蝕得過華爾街狙擊手,踏入一七年就擸起衫袖做嘢,向中巴董事局發信炮轟其管理層,連珠炮發式數落,劈頭第一段,踩到中巴管理層一文不值——under-managed、under-whelming、less-than-desirable、management's poor effort,再數公司物業估值師冇乜人識little-know,上市公司客欠奉,公司又唔識搵肯摸頂買地土豪發展商合作發展,又唔識同銀行借錢或賣樓花。

而臨尾一棍是質疑董事年紀大,最後生七十八歲,最老八十六歲而又沒有接班安排,中巴股價,在亞皆老街狙擊手稍稍「聲東擊西」之下已升咗兩成有多,但距離資產價格每股$233仍有想像空間,聽聞正拉攏其他主要股東聯手逼迫,中巴呢隻老股,真係愈睇愈sexy!

周大福縮鋪有盤算

繼去年縮減七、八間鋪,周大福早前宣布,來年將關閉五至六間鋪,關閉那些店鋪可能要視乎業主是誰。其中由鄭裕彤家族持有的周大福企業這私人錢包,租予上市公司周大福(1299)就有七、八個鋪位,如尖沙咀栢麗大道及彌敦道周大福旗艦店,一四年時月租分別要二百七十萬及一百六十三萬元,零售業低迷,想搵個大客頂租非易事,有周大福企業庇蔭下的分店摺埋機會相信甚低,員工個心都定啲。

中環寸嘴殺入老巴剎開房

灣仔老巴剎個廚Billy Chung以前被一個不單自己懂打造名牌,連歷任妻房也是名牌的富豪「包」過做家廚,不過做家廚悶到抽筋,出嚟搞間老巴剎過吓癮,家陣又被岳少包起;最近搬咗個新竇,星期六晏晝踩到入去,啲侍應劈頭第一句,今日要食小菜喎,我梗係知,唔通我走到嚟食碟頭飯咩!不過老巴剎都好似鏞記咁,平日呢度碟頭飯OKo架,正所謂平貴得宜,豐儉由人啫。坐低即刻同企枱講:「個廚今日有冇返工先?」梗係個廚喺度我先點隻胡椒蟹啦,做廣告出身嘅廚Billy Chung好識做嘅,攞埋佢樽私伙威士忌俾我試,咁又君復何求,你估佢唔知你敬我一尺,我敬你一丈道理咩!仲識得「開房」招呼,等我唔使坐堂座逼逼狹狹。個個有錢佬嚟食都係點胡椒蟹、海南雞飯,我就同呢個廚交流,富豪風流秘聞,吖,唔知佢口密還是扮傻,竟然有啲料我仲知得多過佢,咁先知我識嘢!

楊國佳工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

林鄭背後低調的男人

林鄭為官三十多年,一直把老公冚到密密實實,能見過其夫的官場同事五隻手指數得晒;林鄭宣布角逐特首記者會上更特意指出丈夫很低調,請傳媒別打擾。若然林鄭做特首,畢業於劍橋的老公林兆波Dr. Lam是否要調校一下,假如作為特首的男人,難以長期站在背後,事關有唔少慈善團體如紅十字會,都會委任特首另一半作為該會會長,到時Dr. Lam是否要由低調變「中調」?

亞皆 老街 狙擊手 狙擊 中巴 第一 一炮
PermaLink: https://articles.zkiz.com/?id=235071

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019