|
||||||
|
上月，恒生指數由一萬七千三百點高位，下滑逾一千五百點；讓久久未嚐敗績、沉溺在過往三年牛市裡的投資者，恢復些微危機感。 風雨暫已止息，本刊請來講股專家、散戶，及證券界老行尊，講述他們過後的感受和得着。‘想贏，就要夠膽輸。’ 台灣人尊崇的，是台塑董事長王永慶、鴻海董事長郭台銘等經營之神。我們呢？看傳媒吹捧出一個未經歷過股災的「少年股神」，他開壇講股，又會有二千人走去聽，香港人真係傻傻哋！ 其實，投資講求眼光及風險管理。我是愛賭，炒金又炒銀，但也仔細分析過：全球資金氾濫，未來通脹必會持續經年，人們始終會習慣高企六十元的油價，對貴金屬等資源亦然。 所以，即使上月金價一度跌至每盎司六百三十美元，比我的入貨價低二十美元；繼而商品價格下跌，引發全球小股災，我也毫不擔心。當初決定買金，便知道會有風險；想贏，就要夠膽輸。 金價今日回升至六百六十美元，證明我的堅持沒錯。 ‘玩股票，是不歸路。’ 我 最憎放長假！我一分鐘望唔到股票機，已經渾身不自在。每朝睜開眼，滿腦子都只有股票，十點鐘準時落股票行打躉，見到股價上上落落，先感到實在、有滿足感； 去飲下午茶，見到餐牌寫午市套餐$498，都會諗498是哪隻股票號碼、最近表現如何；四點鐘收市後，心情立即覺得好空虛，就像吸毒般，戒不掉。 近來市況波動大，朝早升二百點，下午倒跌二百點，個心成日「囉囉攣」，發夢都見到一個個數字在跳；之前本來已報名參加旅行團去歐洲玩，但最後都係唔放心，迫住取消。費事十幾日後回來，唔知變成咩世界。 股 民的天敵，其實係自己。股價向上跳幾個位，已經想獲利；跌的時候，反而想揸住過世。講真，炒股多年，我怎會不明白「贏粒糖、輸間廠」的簡單道理？但日日對 住股票機，好難做到。譬如我原先以五元多買入中國人壽，見它升至九元多，就忍不住沽售，換來滿手跌得最利害的資源股、礦業股，結果輸番晒。後悔都無用啦， 再揀一次，可能都係錯多次。 玩股票，是不歸路。我以前老闆試過由一千萬元炒到變三千萬元，但轉頭又可以輸到人間蒸發、公司執笠。所以，我的投資戒律第一條，就是要將炒股票的錢與生活費分開。但我始終擔心自己不知哪天會賭性大發，故決定唔娶老婆，費事炒燶孖展，盞害人！ ‘女人，最緊要保住老本’ 四月底，連任總（任志剛）都講到出面，叫投資者注意風險。我自己亦察覺每逢出席飯局，人們的話題總離不開股市；正如當日凱旋門成為談論焦點一樣。我知道，是市場過熱的訊號。 為安全計，我沽清手上的新鴻基地產、平安保險及交通銀行，只保留一隻地鐵。女人，最緊要保住老本；更何況組合已獲利一倍，便套現過百萬元，全存進銀行做定期。 最初賣清股份後，股市還是不停升，甚至高見一萬七千三百點，都會覺得錯過近一成升幅，好唔抵！直至上週一，我整天忙着，放工後聽說股市暴瀉五百點，才懂慶幸自己避過一劫。 論股票投資，我只是新手。人生第一隻股份，就是○○年上市的地鐵。其上市編號，剛巧跟我的職員編號一樣，便跟大隊入飛，今日也捨不得放。雖然憑直覺，我看好中國發展，但不太曉得分析，只是一味聽四叔李兆基話：認購大型國企。 近兩、三年，我愈來愈覺得香港的房地產市場已非常成熟，發展空間遠遠不及金融業。故我打算報讀中大的金融課程，認真鑽研股票；順便考個證券經紀牌照，說不定，還可以轉行呢！ ‘切勿盡信專家。’ 我鍾意去投資講座，差不多是週末的指定節目。久而久之，識落成班老友，每逢見有講座，就互相幫手留位，聽完一齊去飲茶，傾傾上週戰績。 聽 講座多年，邊個專家有料、邊個交行貨，我怎會不知？好似陸叔（陳永陸），功課都懶做，他說哪隻股份會升，你即刻放貨就實啱！最搞笑是，陸叔於雅虎 （Yahoo!）設有投資組合，個倉不時可以在全日最低位買貨、最高位出貨，咁贏梗啦！有次講座，我潤他：「喂！陸叔，個價閃一閃你都入到，好嘢喎！」他 即頭耷耷，以笑遮醜。 我最近帶埋阿Ben去聽，他正修讀證券課程，打算入行。我要他知道，切勿盡信專家，自己要多做功課。他沒有投資本錢，我便打本五萬元給他實戰，無任何限制，用來炒窩輪都可以。以前我炒窩輪都輸鑊甘啦！若未輸過，他始終會有心癮，好難腳踏實地投資。 雖然講好七月要交成績表，目標賺三成回報，但除玖龍紙業及精熙等幾隻新股外，他手持大部分都是現金，說要等股市再跌才買。 以前兩仔爺無偈傾，現在他負責睇實網上討論區，我就揭報紙、雜誌看分析，每晚大家交流股票經，關係跨進一大步，其實已經穩賺了。 ‘散戶買股……息字行頭！’ 中銀香港的股東大會通告，過往都寫明「不設茶點招待」。今年無咁寫，哈，果然有件西餅、果撻食。 我手上的中銀，是四年前以八元七仙半抽中的新股，現價已升至十五元。點解唔放？一年收息八毫幾、年息十釐、最多十年就歸本。薪高糧準，點解要放？ 現在人人迷信中國力量、個個講增長，但我堅信經常派高息的股份，才能證明賬目並非亂作，唔係「齋吹水」。 其實，我以前都鍾意投機。我仲記得，七二年第一次買股，就錯選了國銀亞洲。此股已人間蒸發，連它的號碼我都忘了。 現在學乖了，寧願逛街，四處尋找投資靈感。譬如兩、三年前，大批自由行來港，我發現內地人會一打、兩打的買白花油回鄉，便下注白花油國際。當日入貨價不過一元多，去年中期派息兩毫，一拆二後，末期息再派五仙，息率高逾二十釐。 講到尾，散戶買股，咩都係假，最緊要係息字行頭！ ‘睇圖表炒股，好傻。’ 我十六歲已經在上海當證券經紀，可謂見盡風浪。今次港股調整，不過是場小風波。 七三年那種跌市，才叫股災。那時剛有遠東交易所，開始多散戶炒股，有的甚至炒到過百萬身家。好巴閉啦，中環華人行塊地都係賣二千萬元咋！故當年恒指由一千七百點跌至百餘點時，很多人都受不了刺激，入青山的、跳樓的都有。 九七年紅籌熱，亦是瘋狂的年代。好像光大控股，由一元多炒到上二十六元，過百倍市盈率。該股現價才四元多，股民根本翻不了身。 今回散戶傷亡不算慘重，除了炒窩輪、借孖展那批。 其實炒窩輪，真係輸硬；不如去澳門仲好，起碼賭大細，贏輸機會都算一半一半。只要諗吓窩輪商點解可以聘請大量專家、贊助電視和電台節目，又搞講座？錢從何來？窩輪商只要在認購證到期前把股價壓下，就一定贏，加上窩輪有溢價，又無息收，根本並非公平遊戲。 睇 圖表炒股的，又係傻。滙豐加上中移動已佔恒指四、五成，大戶好容易便可操控走勢。技術分析說什麼移動平均線、什麼圓頂雙頂，說穿了都是人為做出來，整到幾 靚都可以。整個「死亡交叉」（技術分析術語，即短期的移動平均線跌穿長期的移動平均線），等散戶以為跌市將臨，大戶便可低位掃貨。 我七三年掃滙豐；八四年以七元買入十萬股長實，其後一拆五，至今未計利息都值四千萬元；兩股現值逾億元。幫我剪髮的上海師傅，肯聽我講有錢就四百股、八百股的儲滙豐，退休時揸住一千萬元，可以在揚州買地起屋，生活無憂；唔聽講的，到現在七、八十歲，仍然做到無停手。 此方法，今日一樣行得通，改儲交通銀行，我自己也有入貨。二十年後，保證回報和味！ |
||||||