|
「新昌」呢個招牌在香港建築界曾經響噹噹；昔日新昌營造這個老牌建築商與香港度過經濟起飛歲月，據《時代週刊》九七特輯講，葉謀遵係第一個引入現今觸目皆見之天秤，冇呢味嘢，香港建築業點可以咁發達？ 而無論係白加道政務司官邸、啟德客運大樓、海洋公園、美孚新邨，新昌都有參與，葉謀遵剛於上月在加州過身，享年八十五歲，他對新昌有濃厚感情，曾說過新昌係咪葉家持有唔緊要，只希望新昌個名得以保持，十多年前雖已年過七十，對新昌因涉公屋短樁事件被釘牌耿耿於懷，遂大刀闊斧返新昌搞改革，難得對仔女葉維義及葉儀皓也身體力行，返回新昌與老父齊齊改革，總算還老人家心願；葉謀遵深明「新昌」最值錢係個朵，已易手予天津物產集團的新昌，今年投得海洋公園萬豪酒店建築項目，聲稱新昌成立於一九三九年，植根於香港……不過要認清今日「新昌」不同昔日「新昌」！ Boe媽有市場價值 曾經介紹姪女Cindy（又稱Michelle）予彤叔認識的Boe媽顧紹芬近排蒲頭，當日有份陪彤叔在置地飲下午茶「睇辦」的私人銀行家大嘆無奈，被誤以為他有份「Get the deal done」，謂當日收到老總彤叔電話要求，陪他去「溝女」，米飯班主叫到，唔通say no咩，事件曝光後，呢位banker反而被銀行「加分」，大孖沙咁「私人」嘅事務都叫埋你陪，即係好信任你噃，其實私人銀行家好，Boe媽都好，在市場上都是做中間人「促成交易」啫！Boe媽其實有其市場價值，聽聞啲「伯父」自知有朕「老人味」，有時都怕後生女抗拒，咁就要搵Boe媽事先配對啦！ 中環寸嘴首飾箱都變Truffle箱 今年喺公益金慈善晚宴，拍咗隻大花膠，鋪王波叔個仔鄧耀昇都係搞手之一，即管拎隻花膠去佢東海薈度整，捧吓佢個新裝修嘅場，等波叔善有善報，話晒係慈善花膠，梗係搵埋至親至愛一齊食，隻大花膠發咗都切到四十二嚿，應該冇抽水啩，起碼有三圍人同我一齊happy吖。做善事呢家嘢，梗係要分享，你估好似當年某大慈善家又捐美國母校巨款，又用百五萬投咗一嚿白松露咁威威，但係個家姐就踎酒樓食盅雪藏雞腳排骨飯，之後仲俾家姐公布天下咩？呢排咁啱四季酒店搵埋個喺意大利攞米芝蓮兩星嘅廚，promote緊白松露Truffle，咁都要捧吓場交吓功課嘅，世界而家唔係咁好景咋，咪幾嚿水慳慳哋整幾片（3克）白松露食住先囉！嘩，點知好似首飾箱咁捧出嚟，堪稱係白鑽石喎，個廚都識做刀下無留手，磨多兩片俾我，我問係咪冇乜人柯打過呀？吖，個captain已經識得擋駕，死撐話：「唔係……有人柯打過。」咁有幾多呀？十粒八粒呀？「唔係，賣過10g！」 楊國佳工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。 強國人借「阿拉斯加蟹」走資 強國人為調錢離國，認真絞盡腦汁，溫哥華地產經紀報訊，有日強國人客仔請食飯，揀咗在烈治文剛開張的福滿樓，飯後竟然唔使找數，記賬就行了。原來強國客一次過以銀聯碌一萬加紙（約五萬八千港元），每次食飯就從中扣錢，以銀聯在海外碌咭冇限額，咁，即係變相走資，而且當地唔少酒樓均由強國人經營，自己友更加易話為，所以酒樓生意十分旺場，下午三、四點，都有強國人摷隻十磅八磅，起碼五百蚊加紙嘅阿拉斯加蟹大擦一餐！呢鋪真係有大食大，資金先走得快！ | ||||