ZKIZ Archives


上周末同恒隆講拜拜中環在線:吳士元幾億落袋 李華華

2011-1-24  AD





 

藍籌股又放榜 喇!今次會由恒隆地產(101)同恒隆集團(010)喺今個禮拜三(26日)揭開序幕,公佈截至舊年12月底嘅中期業績。華華仲記得,恒隆前執行董事吳士 元喺舊年7月,即係恒隆公佈全年業績之前辭職,引起市場一陣哄動,話晒吳生喺恒隆做咗9年,唔多唔少已經等同恒隆嘅標誌,陳南祿一嚟做董事總經理,佢就同 公司分手,真係盲嘅都知咩事啦!

講番吳士元,佢辭職之後一直好低調,無咩聲氣,不過原來佢上個周末先至正式喺恒隆last day,聽講一班舊夥計仲為佢設宴fairwell,鬼咁有人情味。華華聽聞,吳士元舊年7月遞信辭職,由於佢係高層,所以要半年通知,佢喺呢半年,名義 上仲係恒隆員工,只不過個人冇返工啫。

如果係咁嘅話,照計佢手上批認股權仍然可以行使,佢未辭職之前已經行使咗小部份認股權,袋咗過億落袋;恒隆股價喺過去半年一直高企,挨近40蚊,粗略計吓,如果吳士元行使晒所有認股權,起碼袋多兩、三億,真係唔使做都生活無憂啦,使乜打工受老闆氣喎!

多啲時間做善事陪阿媽

聽講吳士元辭職之後,四圍飛旅行散心,仲做返個孝順仔,經常陪90歲嘅阿媽飲茶食飯傾偈。佢亦有時間親身參與慈善活動,舊年10月就參加咗「無止橋基金」搞嘅活動,去甘肅農村睇吓點幫人起橋,令當地人生活方便啲。換轉以前,佢邊有時間身體力行吖,最多咪捐錢了事。

計華華話,一個人營營役役打咗幾十年工,可以放番個無憂無慮嘅悠長假期,做自己之前冇時間做嘅嘢,係一種福氣,塞翁失馬焉知非福呢?

[email protected]


PermaLink: https://articles.zkiz.com/?id=21850

Next Page

ZKIZ Archives @ 2019