|
||||||
|
印刷界前輩Ｃ約 吃午飯，搵埋佢位在中環上班嘅千金與馬主Ｎ一齊，去邊度呢，前輩Ｃ話佢自細就跟爸爸到永吉街陸羽，佢在港大畢業後，在中環做事，又經常到史丹利街陸羽，不 如就去陸羽地下啦。左丁山準時去到，前輩Ｃ未至，於是問一位收銀枱邊嘅肥侍應：「Ｃ先生訂位嘅？」肥侍應望咗左丁山一眼，即刻話：「冇。」再問「Ｃ小姐訂 位呢？」答案又係：「冇！」左丁山為之冇符，只得打電話搵前輩Ｃ，點知佢已經人在門口，入到嚟就有卡位坐，熟客係唔同啲嘅，左丁山係二樓三樓熟客，喺地下 就碰晒釘！ 前輩Ｃ話佢伯爺係粵劇戲行中人，當年與薛覺先、馬師曾等人常在陸羽飲茶，故此自幼就在陸羽行走，依家就帶佢位千金嚟認識吓。佢位 千金原來係位地產投資專家，在國際私募基金工作，年紀輕輕已負責一個中環寫字樓嘅項目，佢又經常要去菲律賓印度做deal，尤其是菲律賓為多。咦，菲律 賓？香港人對菲國印象甚差噃，好多人已經唔敢去當地旅行，Ｃ千金算係一位八十後，成日到菲律賓公幹，唔驚咩？
C千金話： 「去得多就唔驚啦，我就未驚過，其實呢十年八年，菲律賓發展得幾好，吸引不少外國投資者。菲律賓人有一個優勢，就係普通學生嘅英文水平，比印度人還要好， 人工又平，請佢地做銀行嘅後勤支援工作最為適宜。我飛去馬尼拉只要一個小時，飛去孟買要五小時，故此一啲國際機構凡以香港為基地，中國為市場重點嘅，都將 後勤辦公室搬去馬尼拉，嗰邊依家好旺o架，離馬卡提不遠嘅新興市鎮Fort Bonifacio幾乎係菲律賓嘅金絲雀碼頭，值得你去睇吓。」新人物果然為左丁山帶來新知識，自己印象之中嘅菲律賓仍然係一九九四年，治安不靖，綁匪橫 行，外資撤退嘅國度。後來問一位賓架Ｋ，佢話摩根大通、德意志兩大跨國銀行早已將亞洲嘅後勤工作搬咗去Fort Bonifacio，該地有七八千名當地人為外資銀行工作，香港職員如果唔肯搬埋過去，搵另外一份工可也。賓架Ｋ話印度人嘅服務態度冇菲律賓人咁溫柔聽 話，菲律賓有資格爭取做亞洲服務中心及外判（outsourcing）中心。 |
||||||