📖 ZKIZ Archives

港股美國預託證券靠穩，ADR港比指數收報23698點，比香港收市高29點。匯控收80.92元，比香港高0.8%，中移動收77.79元，比香港收高4仙。

美國11月份的工廠訂單及12月份製造業數據理想，在在反映美國經濟正在復蘇當中。原當利好大宗商品市場。不過，商品價格近期已有累積好大升幅，尤其黃金，2010年第四季升了8.5%，全年累積升幅30%。相對來說，大部份的股票仍然大落後。而經濟好轉，亦提高了投資者的風險胃納。資金由較穩陣的商品流入股市。金價昨日大跌2.9%至每安士1379美元；銀價仲勁，勁跌4.7%；油價亦跌穿每桶90美元至89.38美元。

       超市股係標普500指數中表現最差的行業。大摩表示食物成本不斷提升的期間，大型超市連鎖為了吸引顧客，推出大減價活動，導致盈利大幅受損，因而將Supervalu及Safeway評級下調至「減持」。Supervalu應聲勁挫6.4%，Safeway亦跌3.8%；Whole Foods則被BMO調低評級至「跑輸大市」，股價挫3.4%。

昨日講到匯控(005) 的止賺問題，網友貧窮終結者話揸開的好股好難沽，佢咁講:「長線投資股揸開有感情, 帳面有好多盈利(可在朋友面前威吓)」所以唔想沽。這是好多人的通病，這種心態叫做「保守」。好多時人會保守於舊思想，唔想變。

        長期有睇我專欄的讀者，應該有此感覺，我一早就對匯控唔太睇好，甚至數年前言談間會睇渣打(2888) 好過匯控。其實中環茶友之間，當年對匯控的爭議好多，到06年 見佢要大幅撥備，有些人開始有戒心，有些人仍然覺得無問題，仲叫陸羽仁得閒可以叫人買吓匯控。但我當日已有戒心，主要睇住佢條數，當時諗一個好簡單的問 題，佢未來幾年的純利可否有雙位數的增長，答案係唔確定。反而大家開頭唔係好睇得起渣打，但渣打當年話五年內股東回報會翻一翻，即係話五年內股價加埋派息 可以升一倍(當然要有盈利增長支持)，結果真係逐年體現，唔到你唔信。

        講番匯控，07年3月公布06年業績時，撥備大增盈利增長大幅放慢(只是微增4.2%)，已是最早可沽匯控之時。我 引入一個好簡單的方法去睇這件事，用番巴菲特睇價值的方法，見一間公司純利增長急跌，你有無把握估計佢未來幾年盈利會有理想雙位數字上升，若答案係唔確 定，價錢又唔係平，就唔應該買。用同一個邏輯，本來手上揸一隻好股，突然間公布一份好差的業績，叫你當一隻全新股票去買你一定唔買，咁都要開始諗吓，有貨 應唔應該沽。

        遇到呢啲情況，好多人會有啲遲疑，唔想馬上沽，會俾個機會呢隻好股，我建議一個簡單方法，可以俾機會佢，但對一隻盈利前景有疑問的股票，要定一個止賺價，例如跌10%要沽，甚或定闊啲跌20%才沽，但唔好眼光光睇住佢，話係長線投資唔使沽，本質變壞的長線投資，一樣要沽。如果隻股本質無變壞，係市場的大變，如有一個股災隻股跟大市跌，佢盈利仲好好，反而唔使沽。

        你可能又會問，你講到匯控咁衰，如果我在金融海嘯低位33元買，而家都有80元，都賺好多，你做乜話佢唔得? 見到隻股跌得過份去撈，我叫做投機性買入，可以同基本因素無關係，賺夠可以走，又係另一個話題了。

陸羽仁

(我這兩天離港，答問暫停，周五恢復)