美國昨日公布的經濟數據唔好亦唔壞，聯儲局上調GDP的增長預期，但增幅細過預期；而11月份二手房銷售增長5.6%，亦少過市場預估的6.5%；不過上月的二手房售價就出現了8月份以來的首次上漲，略高於10月份和去年同期。 最新犮經濟數據其實了無新意，並未有改變投資者對大市走勢的預期，大家几乎都在收拾心情過聖誕。杜指全日波幅不足40點，紐約證交所成交亦只有7.8億股。 杜指收報11559點，漲26點；標普500指數升4點，收1259點；納指升4點，造2671點。杜指期貨最新報11499點，較現貨低水60點。值得留意的是「恐慌指標」VIX指數續創新低，昨日再跌6.3%至15.45，係三年以來最低。 港股美國預託證券亦無大變動，ADR港比指數收報23102點，比香港收市高57點或0.3%。匯控及中移動繼續個別發展，匯控收80.09元，比香港收低0.1%，中移動收77.40元，比香港高0.3%。 美股昨日水靜鵝飛，但仍然保持住升勢，杜指繼續挑戰2008年雷曼兄弟倒閉前的高位。升勢主要由金融股推動，上周蒙特利爾銀行(Bank of Montreal)稱將以價值41億美元的換股交易收購美國中西部地區的一間大型銀行；日前多倫多道明銀行(TD Bank)宣佈以63 億美元收購克萊斯勒公司前金融部門Chrysler Financial，令投資者憧憬金融行業將有更多併購交易。大家都在尋找下一個潛在收購目標，規模較細地區性銀行變得灸手可熱。其中Regions Financial就炒高7%。First Horizon National亦漲逾4%；美銀收高3%，摩根大通漲2.8%，連續第二日成為表現最好的杜指成份股。 昨天講到直升機父母愛仔女等如害仔女。今日講解決方法，基本概念是「拆毀安全網」。網友Myself話:「而最大鑊的是，我老婆好努力幫個女搵小學，話驚佢長大後唔夠人競爭，而我呢個hea爸爸就同老婆講：『唔使驚啦，佢長大後唔會太差，我地死左點都有兩層樓留俾佢。』我就認為，Myself呢種講法一定要戒，唔可以早早俾仔女知道，佢唔成功有阿爸阿媽照保，佢讀唔到書會送佢去外國讀，佢搵唔到工阿爸阿媽會幫佢搵，佢買唔到樓阿爸阿媽會幫佢買，點解唔鼓勵佢自己試咗先呢？即使你想幫他，唔到最後最後最後關頭唔好出手。 孩子長大後會唔會太差，唔係絕對，而係相對。而家的細路唔會絕對地差，起碼最壞時有政府養，唔會餓死。但佢地會相對地差，當佢地的表現差過自己的同學朋友時，就係相對地差。網友牆頭草講起明珠台早前播的節目《 Hyper parents Coddled kids 》（嬌生慣養），值得一看，節目中講到一個優質女孩，在校成績好，是學生領袖。但出來打工，四年轉五六份工，上司的評語多是「很聰明, 但 ..... 」。她跟著頂唔順打工，自己出來搞按摩生意，但好快輸哂啲錢，破埋產。呢個聰明女返屋企搵阿爸阿媽都得，好似Myself話「唔會太差」，但如果佢同自己的朋輩比較，自己感覺就會好差，頂唔順自殺都有份。 我細個時阿媽經常對我講：「你讀唔到書大過聽乞米！」呢句話好毒（傳統家長係咁），深印在我腦海中，認為唔努力只有死路一條。大個之後才發現，其實若我真係讀唔到書，父母都打算送我出外國讀書，不過當時無同我講，結果我就考咗入香港的大學。 我認為呢條橋都得，明明有安全網，都話俾仔女聽無，叫佢讀好啲書、自己考入大學、拼博做工。有安全網都拆咗佢先，我發覺仔女愈細，呢啲講法愈易入腦，我阿媽就在我3、4歲時同我不斷講這些「要做人努力」的道理。 要令子女知道有緊缺的概念，資源不是無限，錢不是無限，去日本旅行不是必然，所有的東西都是緊缺的，要努力才有所得。我甚至教自己的女兒理財，細路仔見乜都想買，我就話一年只可以從你利是攞200元來買這些不必要的東西(必要的我會買給她)，佢睇見個公仔想買，我就話並非必要，我唔會買，要買用你自己的錢買，佢就會考慮再三，結果10次有9次都決定唔買。其餘一次要買都揀個50元細一個碼的公仔，唔揀佢本來想要的100元大碼公仔。我都係試驗緊，希望呢個方法，到大個時可培養出子女較節儉知足環保的性格。 另外就係身教，父母係點，子女就係點，你唔可以自己一本書都唔睇，只識睇電視，但卻叫子女睇書。你唔可以自己揮霍無度，卻叫仔女節儉，想做好榜樣，一定要有所犧牲。 陸羽仁