ZKIZ Archives


租周大福鋪牙齒當金使

2016-06-16  NM

零售市道不濟,位於皇后大道中嘅周大福旗艦店,也獲業主長實劈租六成留客,月租四百萬降至一百六十萬續租;其實業主長實李家和租客周大福鄭家嘅關係都有段古。

話說一九七八年,當時由馮平山和李冠春創立的華人置業持有的「華人行」有意出售,當時李嘉誠睇中用來做長實總部,鄭裕彤則睇中地鋪做周大福鋪位,為免搶高個價,誠哥口頭承諾如果買到心頭好,會以「優惠」租金租予周大福,最終長實以1.3億將華人行購入,雖然沒有白紙黑字,但老一脫的大孖沙,牙齒當金使,多年來一直相安無事,然而到李澤鉅揸旗,加上彤叔又瞓咗覺,長實近年則以市值租金租予周大福,今次傾減租都拉鋸咗一段時間,長實都係面對現實先肯劈價,難得彤叔個姪周大福非執董鄭錦標夠得體,他表示:「市道放緩獲業主體諒。」

中環寸嘴:去咗烏溪沙度假村

工廈大王楊耀松長子,游走高級酒店、銀行,及知名食肆,與各路人士打交道,自認有jet set生活方式,透過美酒佳餚,察看人生百態,把「生平絕學」不吐不快與粉絲分享。

聽啲老友「老點」,話馬來西亞個Legoland開咗四年,個主題公園成熟晒,即管走一轉去Johor Bahru諗住開吓眼界,嘩,check網上資料表面都OK,一踏入間Legoland酒店就直頭係烏溪沙度假村水準,啲兩、三歲僆仔喺地下砌吓砌吓啲Lego積木,第二朝早拆番晒,後來先知啲老友都係由新加坡帶埋僆仔一日遊冇過夜,唔係好似我咁用四十五度望埋去。小弟衰衰哋都做過吓海外投資考察,梗係巡視吓周邊環境,個Legoland外圍,又起醫院、又起商場同住宅,周圍都招租,「全日空呀」,我睇呢度爛尾樓多,大部分都係大陸公司去做,咩中國建築、中國核建,央企嚟o架;所以勸君所謂一帶一路,實際危機四伏。行完一轉我都費事使錢買飛入Legoland去睇,大家都係期待明年四月一日喺日本名古屋開幕嘅Legoland好過,以我洋雜世家眼光,日本仔對件項目要求同埋執行能力都高啲。今個禮拜父親節,諗起仔時,我死鬼老豆都會帶我哋去吓容龍別墅、雍雅山房,順便食埋飯,老媽子教落萬萬不可outsmart過老豆,功高蓋主係死罪嚟o架,所以同老豆影相,知道自己做細嘅要企低一級,點知神來之筆,佢當呢張相係寶,以為㩒得住我!

坐私人飛機慘過經濟艙

擁有私人飛機嘅香港富豪,仲慘過搭經濟艙客位,因為分分鐘預唔到時間,皆因民航處採用電子航班申請系統太「笨實」,晚十至朝八冇得飛,又有些飛機租賃公司出術,為咗湊住班客仔,喪霸住time slot,搞到真正用家冇晒位,無論想起飛或者降落,飛機必須要七日前提出申請,如果去個悠長假期,就唔擔保有冇時段返香港降落,好似聯合集團創辦人李明治,早排就捕住喺私人飛機商務中心,足足等咗兩粒鐘先可以起飛。呢壇蘇州屎,睇嚟要留番俾新任民航處處長李天柱去執啦。

莊士有風駛

莊士老闆Alan莊近排有風駛,經常約埋班國內地產富豪到東南亞出海遊玩,釣魚、水上電單車盡情享樂聯誼,如果唔係又點搵到個強國富豪,做出破紀錄成交呢?莊士機構(367)旗下的山頂歌賦山道十五號獨立屋,市傳以廿一億出售予深圳富豪陳天紅,樓面呎價高達廿二萬,分分鐘問鼎全球最貴屋地呎價;不過睇真啲持有物業的莊士機構通告,除透露會出售公司旗下之物業外,同時會收購一項物業,呢單交易冇經紀經手,直接刁,估計唔單只出售天價大宅,可能有其他交易仲要對數,不過起碼都做咗個氣勢出嚟先。

PermaLink: https://articles.zkiz.com/?id=201106

Next Page

ZKIZ Archives @ 2019