ZKIZ Archives


澳門晚遊 左丁山

2010-11-18  AD




 

成班朋友本來約 好咗吃晚飯,但商務C臨時甩底,傳來短訊話俾老闆徵召,一齊去澳門應酬歐洲與內地大客喎。第二日飲茶,見到商務C好似眼矇矇咁,梗係在澳門玩到通宵達旦 啦。商務C直認不諱,佢話飲得好癲,又陪客人去夜總會、賭場,接近天光先至返酒店房瞓,朝早十點幾就坐船返港上班。

以前有大客來港,晚上多 數在港招呼,點解o依家要走去澳門咁遠呢?商務C話:「你離開商界太耐咯,香港仲邊有真正晚上娛樂場所吖,o依家澳門啲酒店豪華到不得了,大騷晚晚有,食 飯中法葡菜式任揀,飯後到賭場散銀,跟住到夜總會搵靚女餘興,已係指定動作。我地香港完全冇呢啲條件,所以老闆次次招呼歐洲、內地大客到澳門住一晚。」咁 又係,位位老友到澳門日遊晚遊,都異口同聲讚嗰邊啲酒店靚,屢屢推薦永利、萬利。

 

但與大客到賭場「散銀」,冇乜着數,輸咗 錢大家都掃興嘅啫。商務C哈哈笑:「都話你outo架啦,嗱,馬場你就熟嘞,假如晚上招呼內地客到跑馬地馬場,十二隻馬嘅獨贏位置買齊,每張飛兩千蚊,總 共兩萬四銀,你估中唔中吖嗱?」唓,實有三張飛收錢噃,唔好當我儍。商務C話:「老闆會拎出張W(獨贏)飛出嚟,話幫客人買嘅,啱啱有運氣,中到正。叫我 帶客人去收錢,內地客人都唔知幾開心,話行正運呀!有一次爆出幾十倍大冷門,大陸客笑到o架o架聲。」唔,去到澳門賭場又點?原來仲贏得大,賭幾鋪百家 樂,贏嗰鋪就話係個大客戶嘅。商務C話:「錢銀與女人,萬試萬靈,唔止大陸客戶,歐洲客戶更鍾意,晚遊澳門,大家最happy!」老闆亦happy啫,所 有招待娛樂費用,你估係倒水出門乎,有產品代理出售或有出口訂單,就可以搵得番有餘。

呢啲兒童不宜之故事,晚晚在澳門上演,唔怪得金沙、永 利呢啲美國公司靠澳門翻生,打救拉斯維加斯嘅業務,而澳門今年一至十月嘅賭場收益,已超過去年全年,澳門政府抽稅四成,明年又有大把錢派畀澳門居民,聽足 溫總教訓,公共開支向民生傾斜。


PermaLink: https://articles.zkiz.com/?id=19365

Next Page

ZKIZ Archives @ 2019