樓市濕滯，但校舍有價有市，位於何文田新法書院校舍，剛以六億七千萬出售予英國辦學集團Cognita Schools，該校發言人Brian Rogove指交易四月底才完成，現階段冇乜可透露。 其實新法書院創辦人王澤森深懂經營之道，早年辦學不單以高薪挖角有quali教師，新法嘅老師每年嘅加薪幅度，就視乎學生攞到幾多條A，後來學校陸續停辦後，校舍地皮一樣有價，大坑及太子道西校舍均發展為住宅，王澤森幼子兼新法書院校監王定一有乃父之風，推樓盤時除了佣金特高，更以鮑魚、燕窩及勞力士錶作為經紀獎賞，今次揸旗賣校舍係王定一及其太太，聽經紀講佢哋企得幾硬，即使地契訂明只可作為有三十二間班房嘅校舍，在各路辦學團體湧港搵食之下，成交價較市場預期六億元高。 仙股入恒指 上星期四，恒生指數公司公布指數成分股大執位，恒生指數加入咗長江基建，剔除咗華潤啤酒，賽果正路。但再睇落去，見到「恒生綜合大中型股指數」嘅名單，真係眼都凸。小宗當堂嚇一跳，然後得啖笑！因為加入指數嘅，竟然有剛剛暴瀉完畢、仲被證監會開「快勞」嘅恒發洋參（911）。呢個指數變動，嚟緊三月十四日生效，但用緊嘅數據，竟然係截至去年十二月三十一日嘅。當時恒發仍未經歷半個鐘頭暴瀉九成嘅浩劫，而家恒發股價得番四仙咁大把，市值十億唔夠奀雌雌，咁叫做大中型股咩？喂，有唔少基金追蹤恒生各類指數買貨o架；咁鬼out，一啲都唔與時並進，做乜國際金融中心呢？ 中環寸嘴：用溝女招同banker周旋 工廈大王楊耀松長子，遊走高級酒店、銀行，及知名食肆，與各路人士打交道，透過美酒佳餚，察看人生百態，讓讀者「嗒」落有味。 上個禮拜有條友打電話嚟挑我機，質疑我同加拿大滙豐係咪咁密切，唔怕話你知，如果唔係當年戴卓爾夫人PK，原本諗住讀完書返香港印印腳做牙籤大少，點知逼住要去加拿大開山劈石。嗰時要考慮全加拿大最大嘅Royal Bank of Canada還是加拿大滙豐做我家族嘅major banker，我都好寸o架，叫加拿大滙豐攞本年報俾我睇，吖，佢唔係好想俾我睇，佢話初初新成立，唔可以反映到佢哋嘅strength，醜婦終須見家翁，原來一年先賺得廿萬加紙咋。我買地起樓，問滙豐借construction loan，再租番個鋪俾佢，咁就包有息納俾佢，大家手牽手齊齊上，嗱，呢招等於溝女，先要打殘佢自尊心。讀中學時，班死仔話溝唔到附近學校出晒名叫「大、細吋」嘅靚女，問我有乜橋，我就醒條橋俾佢，先打殘佢自尊心，然後再慢慢呵番佢。 我成日鬧人冇新意，啲壽宴千篇一律係福臨門例牌套餐再切蛋糕，所以我今年「登六」要搞搞新意思，如果我冇新意又點有資格鬧人呀？成個會場以《Star Wars》做主題，搵埋鬼妹part time model扮Elsa，嘩，啲老友啲僆仔玩得幾開心，臨走捧埋啲公仔返屋企，我娛樂人哋多過人哋娛樂我，老友話去完我個party好refreshing，梗係啦，最緊要青春常駐，「登六」等如reborn一樣。 誰是山頂林太？ 「山頂林太」呢個朵到底係乜誰？話說投行內小職員在寫字樓聽到有位i-banker大大聲叫人送貨到其山頂Strawberry Hill紅莓閣地址，並自稱為「山頂林太」，咁揚法，全公司又點會唔知佢住山頂，別以為此林太為《信報》創辦人林行止太太，此林太乃是其新抱何熒也，既然家住山頂咁好環境又唔等錢使，投行近年生意難撈，劈友之聲不絕，呢位「山頂林太」舊年都唔使做，專心湊細路。 | ||||