二十國集團（G20）成員在聯合聲明中同意「克制貨幣競爭性貶值」，但對美元近期猛跌視若無睹，變相為美元繼續下跌開綠燈。議息會議即將召開，市場預期聯儲局將公布第二次貨幣寬鬆政策，美國勢將狂印鈔票，美匯指數昨日再挫0.5%至77.3，原油及金屬等大宗商品價格繼續向上，推動資源股上漲；另外，美國9月份二手房銷售較8月份大升一成，好過市場預期。美股周一造好，杜指開市即抽升逾100點至接近11250點；標普500指數亦突破1200點。
不過，金融股仍然因房貸止贖違規風波困擾受壓，拖住大市後腿，杜指最終未能企穩11200點上方，收市報11164點，漲31點；標普500指數漲3點，報1186點；納指漲11點，收2491點。杜指期貨最新報11105點，比現貨低水59點。
港股美國預託證券輕微收低。ADR港比指數收報23607點，比香港收市低21點或0.1%。匯控及中移動個別發展，匯控收81.38元，比香港收市低0.5%，中移動收80.62元，比香港高0.5%。
美元疲軟，金、銀、銅價齊升，金屬資源股升勢明顯，美國鋁業升1.3%，銅金公司(Freeport-McMoRan Copper & Gold)及南方銅業 (Southern Copper) 齊漲約2%。跨國公司的出口業務亦同時受惠，杜邦升1.9%，卡特彼勒亦漲近1%。
大銀行的止贖操作受到質疑。聯儲局主席伯南克稱監管人員正在對房貸止贖對經濟的影響進行評估，預計初步評估結果將於下月公佈。金融股成為拖累大市的元兇。美銀係全美最大的按揭貸款銀行，佔市場份額超過兩成，自然首當其衝，近日屢創新低，昨日逆市再跌2.5%，摩根大通亦下跌1.7%。係杜指表現最差嘅兩隻成份股。
網友維園社工引述了一段關於iPhone的評論:「身邊行家、朋友兼同事幾乎都好似白雪公主中了巫婆的蘋果毒，非用上 iPhone、 iPad不可。蘋果能否繼續獨佔鰲頭不是重點，重點是 3G或 HSDPA年代終於來臨。幾年前，坐公交車時最常見人們用免提打電話煲粥；今日，明顯是用手機上網看電郵睇電子版報紙。
現時香港智能手機滲透率約為兩成，歐洲智能電話滲透率最高的 3個國家，意大利、西班牙和英國分別達 32%、 28.3%和 22.4%。考慮到香港手機滲透率冠絕全球（超過 170%），智能手機在未來數年繼續增長，實在毫不出奇。App生產及銷售，不僅是出版及消費方式的未來，潛力無可限量，這個真的是killer器材了。」維園社工問我對3G的前景, 有何前瞻見解。
我對iPhone及3G有幾點觀察。第一，蘋果iPhone獨領風騷。好多未用過iPhone、特別是不喜歡電玩的朋友，根本未明白iPhone的性質。iPhone作為1隻電話，其功能仍然係比較「流」，我用iPhone3的時候，早已發覺佢上電話網功能有少少問題，其中1隻電話脫咗網經常上唔番，攞去整佢換過隻新電話俾我就算，而用iPhone4叫做好啲。但你換一個角度，將佢當部小型電腦咁睇，又發覺係另一個世界，唔單止可以上網，佢仲有一個好大的apps(應用程式)市場，而家講緊係幾十萬個apps，佢歡迎開發商製作apps上去賣，然後和它分錢，結果用家就日日有新apps玩，令好此道者有全新體驗。聞說而家香港智能電話市場，iPhone佔咗7成以上，根本係獨領風騷。
第二，3G已經成勢。未有iPhone前，3G電話唔係幾掂，因為用家俾多咁多錢買3G電話，都唔知有乜好，上網又慢，螢幕又細，基本上並唔係好好的經驗。蘋果唔係手提電話商，佢做的iPhone電話功能的確好一般，但佢係電腦商，所以iPhone作為微型電腦的功能不一般，無論開機啟動速度、觸控屏幕、放大縮小功能等，都解決了很多用手機上網的不便，大大提升了3G電話連接網絡的功能。iPhone的成功，已令3G客戶大量提升，而Google早已預視這個局面，大力開發Android平台，予願意用這個平台的手機商使用，以抗衡蘋果，雖然暫時效果一般，但亦予HTC等手機商一條活路。我估蘋果的實質壟斷中短期還會繼續，但長期難以永續，但手機互鬥，最終會令3G手機全面覆蓋整個市場，3G多過2G的日子不會太遠。
第三，和黃受惠3G。和黃是一隻集電訊、碼頭、石油、零售和地產在一身的綜合企業，過去10年，一直受3G業務不前的夢魘困擾，業績唔好時又賣吓業務，頂一頂。等咗咁多年，終於等到3G出頭。雖然iPhone賣得，只是令和黃部份代理iPhone的地區受惠，但在iPhone熱潮推動下，3G電話在全球成行成市，對和黃的3G當然有好處，3G業績由出血變成有正現金流，整個3G業績由負值變成正值，甚至是有不細的價值。和黃現時自我感覺相當良好，去年曾傳出要分拆加拿大赫斯基石油上市，如今又唔見影，似乎又睇好油價，亦唔急於要製造業績。
雖然歷史高位唔一定有參考價值，但2000年科網狂潮時和黃的確造過138元，在07年亦高見100元(但唔好忘記和黃07年純利306億，去年純利只有142億)，而家急升上番80元樓上，與歷史高位仍有啲差距。大股上升都有一個過程，唔會太快出現，太快玩完，當然中間會有反覆。和黃短期升得太急，可以等佢調整時吸納，希望可以食一食呢個3G浪潮。如果有貨在手，亦不妨訂番個10%的止蝕位。股價已經去到接近52周新高，已經升咗超過七成，出現深一啲調整，唔出奇呀。