|
|||
|
港股由9月升到o依家都算還得神落，但係上個禮拜五，恒指收市前係咁畀人質落去，結果連條「升市事業線」（即係條10天平均線）都保唔住，全世界自然有淆底，驚個市差唔多見頂玩完。咁到底10月最後呢個星期個市係咩走勢呢？中環班老友就提醒華華，咩事業線呀陰陽燭呀都係假，因為有翻手為雲、覆手為雨、開親戲都隊市秋官（鄭少秋），原來今晚將有套劇《書劍恩仇錄》亞視首播！會唔會再累街坊今日就知，雖然係迷信，但華華都係唔好唔信邪。 新劇今亞視首播 秋官之所以成為股市毒藥，華華真係不厭其煩再同大家講講！話說1992年，秋官主演電視劇集《大時代》，故事講述鄭少秋飾演丁蟹，經常熊市借拋空期貨賺取暴利，正好當時港股暴跌，股民損失慘重，「丁蟹效應」呢個名應運而生。 無獨有偶，其後秋官次次出劇，大部份都係同大市相剋，搞到遍地屍骸。自此，秋官就成為股市掃把星，甚至連大行里昂都曾經就秋官效應發表研究報告，認真唔講得笑！ 咁秋官效應到底有幾勁？遠就唔多講，單係今年劑已經搞到A股市！今年5月10日，秋官主演電視劇《神醫大道公》大陸央視播出，結果第二日，A股就跌2%，播到第六集日仲瀉5%，係今年最差，統計成套劇上演期間，滬綜指總共跌6.5%……秋官效應就連內地股市都頂唔順，你話勁唔勁？ 秋官效應近年威水史 －深股重創－ 10/5/2010 CCTV8首播《神醫大道公 》，5月11日中國上證指數收跌148.3點，而深證成份指數仲失守萬關，收報9905.48點 －失守萬四－ 30/3/2009 《桌球天王》首播，恒指開市即失守14000點，收跌663點 －累挫3000點－ 3/10/2008 《楚漢驕雄》重播，至10月10日總計成個星期恒指跌2886點 －合唱都出事－ 10/11/2007 同愛女鄭欣宜綜藝節目合唱《天涯孤客》，跟住個周一(11月12日)一開市，恒指就跌成1315點 －美國同受累－ 8/2007 《潮爆大狀》、《大時代》美國播放，引爆美國次按風暴 －首播即跌－ 5/2007 《謎》首播翌日，恒指跌111點，到5月30日恒指跌到得番20300點，累計跌795點 李華華 |
|||