|
||||||
|
特首發表施政報告之日，立法會否決特區政府擴大將軍澳堆填區之議，曾特首話明，立法會唔批准事，政府唔會做。環境局局長邱騰華都幾黑仔，舊年施政報告建議推行「慳電膽」計劃，點知因為特首親家係慳電膽代理商，引起一場風波，整件事卒之不了了之，今年發表施政報告，邱局長為勢所逼，硬闖立法會，又俾泛民加建制派聯手反對，而由佢推動「停車熄匙」法例，在立法會未有充份把握通過，點搞好呀？邱局長次次上立法會都要騰晒雞，如果改名命做「邱定華」，會唔會定一呢！ 改名係開玩笑，處理垃圾呢件事就唔可以開玩笑，香港每日咁多垃圾，如果堆填區爆滿，無地容身，那麼如何處置，唔通任由香港變臭港？最好之解決方法就係建造科技環保式焚化爐，一燒了之，但以前話在屯門區興建焚化爐，區議會極力反對，之後不見下文，現時香港市民之NIMBY心態，十分嚴重，個個區議會都反對在本區建造焚化爐，如何是好？ 呢日碰到一位政府高人，佢話興建焚化爐係最佳解決香港垃圾方法，將不可循環再用之垃圾燒掉，係先進國家最常用方法，日本便是如此，聽講日本人興建焚化爐，可在住宅區內，居民不反對，香港可以借鏡，左丁山同高人講：「香港人點同日本人咁崇尚科技呀？」高人話：「樣樣都話唔得，邊有得揀呀？我地唔在人地後花園建造，就在人人後花園建造，每區一個，必要時一爐兩用，可以火化埋人類動物類遺體，全面向日本學習，日本能，為何香港不能？」 每區建造一個焚化爐：成本一定高，因為冇「規模經濟」嗎，但本區垃圾本區燒，垃圾車唔需要跨區行走，可以減少垃圾之「碳足跡」（carbon footprint）未嘗不可，高人之言，不知特區政府會否推行，還是只係對立法會否決擴建將軍澳堆填區之即時反應。大概如果一眾議員反對（一）堆填區、（二）在某區興建大型焚化爐、（三）垃圾徵費。政府無路可行話，不排除提出一區一爐！ |
||||||